ہاؤسنگ سوسائٹیوں نے دریائے راوی کی زمین معصوم لوگوں کو بیچ کر اربوں روپے بنا لیے، خواجہ آصف

پچھلے سال بے شمار گھر سیلاب سے تباہ ہوئے، برسات آنے والی ہے، دعا ہے مزید معصوم لوگ ہاؤسنگ سوسائٹیوں کے مالکان کے ہاتھوں لٹنے سے محفوظ رہیں؛ وزیر دفاع کا بیان

ساجد علی جمعرات 2 جولائی 2026 18:49

ہاؤسنگ سوسائٹیوں نے دریائے راوی کی زمین معصوم لوگوں کو بیچ کر اربوں ..

اسلام آباد (اُردو پوائنٹ اخبارتازہ ترین۔ 02 جولائی 2026ء) وزیر دفاع اور مسلم لیگ ن کے سینئر رہنما خواجہ آصف نے ملک میں ہاؤسنگ سوسائٹیوں کے مالکان اور زمینوں پر قابض مافیا کی جانب سے عام شہریوں کی زندگیوں اور عمر بھر کی جمع پونجی سے کھیلنے کے سنگین معاملے پر آواز اٹھائی ہے، انہوں نے دریائے راوی کی زمینوں پر غیر قانونی قبضوں اور برسات کے موسم میں سیلاب کے ممکنہ خطرات کے حوالے سے انتظامیہ اور متاثرین کو خبردار کردیا۔

اس حوالے سے اپنے ایک بیان میں خواجہ آصف نے انکشاف کیا کہ پچھلے سال بے شمار ہاؤسنگ سوسائٹیوں نے دریائے راوی کے قدرتی بہاؤ اور اس کی ملحقہ زمین کو لاوارث اور لاوارث سمجھ کر وہاں غیر قانونی طور پر پلاٹس کاٹ دیئے، ان سوسائٹیوں کے مالکان نے ان خطرناک جگہوں کو معصوم اور سیدھے سادھے لوگوں کو جھانسہ دے کر فروخت کیا اور اس غیر قانونی دھندے سے سینکڑوں ارب روپے بٹور لیے، جن لوگوں کے پیسے ڈوبے، وہ آج بھی انصاف ملنے کے منتظر ہیں۔

(جاری ہے)

پچھلے سال بے شمار گھر جو ھا ؤسنگ سوسائٹیوں نے راوی دریا کی زمین لاوارث سمجھ کے پلاٹ بنا کر معصوم لوگوں کو بیچ کر سینکڑوں ارب بنا لیے۔ وہ آج بھی منتظر ھیں کے انکو انصاف ملے۔ برسات آنے والی ھے سیلاب کا خدشہ ھے ۔ دعا ھے گزشتہ سال کی طرح تباہی و بربادی نہ ھو اور مزید معصوم لوگ سیلاب…
— Khawaja M. Asif (@KhawajaMAsif) July 2, 2026

وفاقی وزیر نے موسم کی موجودہ صورتحال پر تشویش کا اظہار کرتے ہوئے کہا کہ اب ایک بار پھر برسات کا موسم آنے والا ہے اور دریا کے کنارے بنائی گئی ان غیر قانونی آبادیوں کو سیلاب کا شدید خطرہ لاحق ہے، اللہ پاک سے دعا ہے کہ اس سال گزشتہ سال کی طرح کی تباہی و بربادی دوبارہ دیکھنے کو نہ ملے۔

خواجہ آصف نے اپنے بیان کے آخر میں دعا کرتے ہوئے لکھا کہ دعا ہے مزید معصوم لوگ ایک طرف سیلاب کے ہاتھوں بے گھر ہونے اور دوسری طرف ان بے رحم ہاؤسنگ سوسائٹیوں کے مالکان کے ہاتھوں لٹنے سے پوری طرح محفوظ رہیں، آمین۔