پاکستان کے مختلف شہروں میں انٹرنیٹ سروس سست ہونے کی اطلاعات، صارفین پریشان

ڈاؤن ڈیٹیکٹر نے کنکٹیویٹی متاثر ہونے کی تصدیق کردی، پی ٹی اے تاحال خاموش

ساجد علی جمعرات 2 جولائی 2026 19:41

پاکستان کے مختلف شہروں میں انٹرنیٹ سروس سست ہونے کی اطلاعات، صارفین ..

اسلام آباد (اُردو پوائنٹ اخبارتازہ ترین۔ 02 جولائی 2026ء) پاکستان کے مختلف چھوٹے بڑے شہروں میں انٹرنیٹ سروس اچانک شدید سست ہونے کی شکایات سامنے آئی ہیں، جس کے باعث آن لائن کام کرنے والے افراد، کاروباری حضرات اور عام صارفین کو سخت مشکلات کا سامنا کرنا پڑ رہا ہے۔

(جاری ہے)

جیو نیوز کے مطابق انٹرنیٹ کنکٹیویٹی اور ویب سائٹس کی ڈاؤن ٹائم پر نظر رکھنے والے بین الاقوامی ادارے "ڈاؤن ڈیٹیکٹر" نے بھی تصدیق کی ہے کہ پاکستان کے کئی بڑے شہروں بشمول کراچی، لاہور، اسلام آباد اور راولپنڈی میں انٹرنیٹ سروس کے تعطل اور سست روی کی لہر دیکھی جا رہی ہے، جس سے متعدد صارفین بیک وقت متاثر ہوئے ہیں۔

بتایا گیا ہے کہ ملک میں انٹرنیٹ سروس اس قدر کیوں متاثر ہوئی ہے، اس کی حقیقی وجہ اب تک سامنے نہیں آسکی ہے، ڈیجیٹل صارفین کے لیے سب سے زیادہ پریشان کن بات یہ ہے کہ پاکستان میں ٹیلی کام سیکٹر کے نگران ادارے "پاکستان ٹیلی کمیونیکیشن اتھارٹی" (پی ٹی اے) یا کسی بڑے انٹرنیٹ سروس پرووائیڈر کی جانب سے اب تک اس خرابی یا سست روی کے حوالے سے کوئی باضابطہ بیان یا وضاحت سامنے نہیں آئی۔