Live Updates

چیئرمین سینیٹ یوسف رضا گیلانی آیت اللہ سید علی خامنہ ای کی آخری رسومات میں شرکت کے لیے تہران روانہ

جمعرات 2 جولائی 2026 19:45

اسلام آباد (اُردو پوائنٹ اخبارتازہ ترین - آن لائن۔ 02 جولائی2026ء) چیئرمین سینیٹ سید یوسف رضا گیلانی آیت اللہ سید علی خامنہ ای کی آخری رسومات میں شرکت کے لیے تہران روانہ ہو گئے۔ ان کے ہمراہ گورنر خیبر پختونخوا فیصل کریم کنڈی بھی ایران کے دورے پر گئے ہیں۔چیئرمین سینیٹ کا یہ دورہ ایرانی پارلیمان کے اسپیکر محمد باقر قالیباف کی دعوت پر ہو رہا ہے، جہاں وہ آخری رسومات میں شرکت کے ساتھ ایرانی قیادت سے اظہارِ تعزیت بھی کریں گے۔

روانگی سے قبل اپنے بیان میں سید یوسف رضا گیلانی نے کہا کہ آیت اللہ سید علی خامنہ ای کا انتقال ایران، پاکستان اور پوری امتِ مسلمہ کے لیے ایک عظیم نقصان ہے۔ انہوں نے کہا کہ مرحوم غیر معمولی بصیرت، دانشمندی اور قائدانہ صلاحیتوں کے حامل رہنما تھے، جنہوں نے خطے اور مسلم دنیا میں اہم کردار ادا کیا۔

(جاری ہے)

چیئرمین سینیٹ نے کہا کہ پاکستان نے آیت اللہ سید علی خامنہ ای کی وفات سے ایک مخلص دوست جبکہ مسلم دنیا نے ایک دور اندیش قائد کھو دیا ہے۔

انہوں نے ایرانی پارلیمان، حکومت اور عوام سے دلی تعزیت اور ہمدردی کا اظہار کرتے ہوئے کہا کہ مرحوم کی خدمات اور قیادت کو ہمیشہ یاد رکھا جائے گا۔انہوں نے دعا کی کہ اللہ تعالیٰ مرحوم کے درجات بلند فرمائے، ایرانی عوام کو یہ صدمہ برداشت کرنے کی توفیق عطا کرے، اور پاکستان و ایران کے برادرانہ تعلقات باہمی احترام، دوستی اور مشترکہ اسلامی اقدار کی بنیاد پر مزید مستحکم ہوں۔