Live Updates

شہید آیت اللہ خامنہ ای کی آخری رسومات، نماز جنازہ کے دن 2 کروڑ سے زائد افراد کی تہران آمد متوقع

تہران، قم اور مشہد کے شہروں میں بھی نمازجنازہ کی تقریبات منعقد کی جائیں گی، کروڑوں سوگواروں کی تہران آمد کے پیشِ نظر بڑے پیمانے پر انتظامات کیے جا رہے ہیں، میڈیا رپورٹ

ثنااللہ ناگرہ جمعہ 3 جولائی 2026 18:53

شہید آیت اللہ خامنہ ای کی آخری رسومات، نماز جنازہ کے دن 2 کروڑ سے زائد ..

اسلام آباد (اردوپوائنٹ اخبار تازہ ترین۔ انٹرنیشنل پریس ایجنسی۔ 03 جولائی 2026ء ) ایران کے شہید سپریم لیڈر آیت اللہ خامنہ ای کی آخری رسومات اور نماز جنازہ کے دن 2 کروڑ سے زائد افراد کی تہران آمد متوقع ہے، تہران، قم اور مشہد کے شہروں میں بھی نمازجنازہ کی تقریبات منعقد کی جائیں گی۔ اےآروائی نیوز کے مطابق ایران کے شہید سپریم لیڈر آیت اللہ علی خامنہ ای کے سفرِ آخرت کے سلسلے میں ملک بھر میں فضا سوگوار ہے، جہاں ان کی آخری رسومات اور نمازِ جنازہ کے موقع پر تہران میں تاریخ کے سب سے بڑے انسانی اجتماع کی تیاریاں جاری ہیں۔

ایرانی سرکاری میڈیا نے بتایا کہ شہید سپریم لیڈر آیت اللہ خامنہ ای کی نمازِ جنازہ کے دن دارالحکومت تہران میں 2 کروڑ سے زائد افراد کی آمد متوقع ہے۔

(جاری ہے)

تہران کی اپنی موجودہ آبادی پہلے ہی تقریباً ایک کروڑ ہے، تاہم ملک بھر سے کروڑوں سوگواروں کی تہران آمد کے پیشِ نظر بڑے پیمانے پر انتظامات کیے جا رہے ہیں۔ دوسری جانب وزیر اعظم شہباز شریف اور فیلڈ مارشل عصم منیر آیت اللہ خامنہ ای کی آخری رسومات میں شرکت کیلئے تہران پہنچ گئے ، ۔

تہران آمد پر ایرانی حکام نے پاکستانی وفد کا استقبال کیا، جبکہ وفاقی وزیر داخلہ و چیئرمین پاکستان کرکٹ بورڈ محسن نقوی بھی فیلڈ مارشل عاصم منیر کے ہمراہ موجود تھے۔ میڈیا رپورٹس کے مطابق فیلڈ مارشل سید عاصم منیر جمعہ کو تہران پہنچے، جہاں ایرانی حکام نے ان کا خیرمقدم کیا۔ وہ آیت اللہ علی خامنہ ای کی تدفینی تقریب میں پاکستان کی مسلح افواج کی نمائندگی کریں گے۔

وزیر اعظم شہباز شریف بھی اعلیٰ سطحی پاکستانی وفد کے ہمراہ ایران پہنچے ہیں، جبکہ پاکستان پیپلز پارٹی کے چیئرمین اور سابق وزیر خارجہ بلاول بھٹو زرداری بھی آخری رسومات میں شرکت کریں گے۔ ایران کے شہید سپریم لیڈر آیت اللہ سید علی حسینی خامنہ ای کی نماز جنازہ کیلئے انتظامات کی تیاریاں تیزی سے جاری ہیں۔ شہید آیت اللہ علی خامنہ ای کی میت گرینڈ مصلیٰ پہنچا دی گئی ہے،اس موقع پر سیکیورٹی کے غیر معمولی انتظامات کیے گئے ہیں۔

آیت اللہ علی خامنہ ای کی نماز جنازہ کل تہران میں ادا کی جائے گی جس کے بعد ان کا جسد خاکی تہران سے قم پھرنجف اورکربلا لے جایا جائے گا۔ پھر میت واپس ایران لا کر آیت اللہ علی خامنہ ای کو مشہد میں سپردِ خاک کیا جائے گا ،جلوس جنازہ میں ایک کروڑ سے زائد افراد کی شرکت متوقع ہے۔آخری رسومات کے موقع پر 6 جولائی کو ملک بھر میں عام تعطیل ہوگی،8 جولائی کو ملک بھر میں یومِ سوگ بھی منایا جائے گا۔