ج*علامہ عارف حسین واحدی کی صاحبزادہ مولانا زاہد محمود قاسمی سے ملاقات

ّعلماء، مقررین، خطباء اور واعظین سے اعتدال، بردباری اور میانہ روی کو فروغ دینے کی اپیل

اتوار 5 جولائی 2026 19:05

ٰلاہور (اُردو پوائنٹ اخبارتازہ ترین - آن لائن۔ 05 جولائی2026ء) نائب صدر ملی یکجہتی کونسل پاکستان، نائب صدر شیعہ علماء کونسل پاکستان،علامہ عارف حسین واحدی کی قاسمی ہاؤس میں چیئرمین مرکزی علماء کونسل پاکستان صاحبزادہ مولانا زاہد محمود قاسمی سے ملاقات۔ ملاقات میں ملک کی موجودہ سیاسی اور مذہبی صورت حال پر تفصیلی تبادلہ خیال کیا گیا۔ دونوں رہنماؤں نے اس بات پر اتفاق کیا کہ پاکستان میں پیغام پاکستان اور ملی یکجہتی کونسل کے ضابطہ اخلاق پر موثر انداز میں عمل درآمد وقت کی اہم ضرورت ہے۔

تمام مکاتب فکر کے علماء، مقررین، خطباء اور واعظین سے اپیل کی گئی ہے کہ وہ اپنے خطبات ، بیانات میں اعتدال، بردباری اور میانہ روی کو فروغ دیں۔ ایسی گفتگو سے اجتناب کریں جو مذہبی منافرت یا اختلاف کو ہوا دے۔

(جاری ہے)

تمام مقدس شخصیات کے احترام کو ہر حال میں ملحوظ خاطر رکھیں۔ دونوں رہنماؤں نے اس عزم کا اظہار کیا کہ پاکستا ن میںمذہبی ہم آہنگی اور امن کے فروغ کیلئے پیغام پاکستان متفقہ قومی بیانہ پر بھر پور عمل درآمد کو یقینی بنانے کیلئے ہر ممکن کردار ادا کیا جائے تاکہ ملک میں یکجہتی کا پیغام عام ہو۔

اس موقع پر علامہ عارف حسین واحدی نے ملی یکجہتی کونسل کے بانیان قائدین علامہ شاہ احمد نورانی،مولانا قاضی حسین احمد،مولانا سمیع الحق،مولانا ضیاء القاسمی، مولانا ساجد میر،علامہ ساجد نقوی، مولانا فضل الرحمن کی گراں قدر خدمات کو خراج تحسین پیش کرتے ہوئے کہا کہ ان اکابرین کی بصیرت، حکمت اورمسلسل جدوجہد نے پاکستان میں مذہبی ہم آہنگی کو فروغ دیا ہے۔

صاحبزادہ مولانا زاہدمحمود قاسمی نے اس موقع پر گفتگو کرتے ہوئے کہا کہ پاکستان میں قومی یکجہتی اور امن و استحکام کے فروغ کیلئے مشترکہ کوششیں قومی پیغام امن کمیٹی کے پلیٹ فارم سے جاری رکھی جائیں گی۔ جس کے کوارڈینیٹر علامہ حافظ طاہر محمود اشرفی ہیں اور وہ بہت عمدہ انداز سے تمام مسالک اور مذاہب کے نمائندگان کو ساتھ لے کر قومی وحدت کے فروغ کیلئے ملک میں سرگرم عمل ہیں۔

محرم الحرام میں ملک میں یکجہتی کی فضاء قائم رہی ہے محرم الحرام سے قبل اسلام آباداسلامی نظریاتی کونسل میں مشترکہ اعلامہ جاری ہوا۔اس کے اثرات دور رس مرتب ہوئے ہیں۔ قومی پیغام امن کمیٹی کے پیغام کو ملک بھر میں عام کرنا وقت کی اہم ترین ضرورت ہے۔صاحبزادہ زاہد محمود قاسمی نے علامہ عارف حسین واحدی کی خدمت میں’’ تحریک تحفظ ختم نبوت اور مولانا محمد ضیاء القاسمی‘‘ کتاب پیش کی۔