گورنرسندھ سید محمد نہال ہاشمی نے تیسری ہیلتھ کیئر ایکسپو اینڈ کانفرنس کا افتتاح کر دیا

کراچی (اُردو پوائنٹ اخبارتازہ ترین - این این آئی۔ 23 جولائی2026ء) گورنر سندھ سید محمد نہال ہاشمی نے کہا ہے کہ صحت کا شعبہ تجارت نہیں بلکہ انسانیت کی خدمت کا مقدس فریضہ ہے، اس لیے صحت کے نظام کو منافع کے بجائے عوامی خدمت اور فلاح کے اصولوں پر استوار کیا جانا چاہیے۔ صحت سمیت ہر شعبے میں رابطے کا تسلسل اور باہمی ہم آہنگی ہی ترقی، بہتر کارکردگی اور عوام کو معیاری سہولیات کی فراہمی کی ضمانت ہے۔

انہوں نے ان خیالات کا اظہار تیسری تین روزہ ہیلتھ کیئر ایکسپو اینڈ کانفرنس کی افتتاحی تقریب سے بطور مہمانِ خصوصی خطاب کرتے ہوئے کیا۔ تقریب میں قونصل جنرلز، معزز مہمانانِ گرامی، ممتاز طبی ماہرین، ڈاکٹرز، شعب صحت سے وابستہ شخصیات اور مختلف اداروں کے نمائندوں نے شرکت کی۔

(جاری ہے)

گورنر سندھ نے کہا کہ "صفائی نصف ایمان ہے اور علاج سے بہتر احتیاط ہے۔

اگر ہم صفائی کو اپنی اجتماعی زندگی کا حصہ بنا لیں تو متعدد بیماریوں اور معاشرتی مسائل پر مؤثر انداز میں قابو پایا جا سکتا ہے۔ علاج، آپریشن اور طبی خدمات کے ہر مرحلے میں صفائی کے اصولوں پر سختی سے عمل درآمد ناگزیر ہے۔"انہوں نے کہا کہ ریاست کی بنیادی ذمہ داری ہر شہری کو معیاری، سستی اور آسان طبی سہولیات فراہم کرنا ہے، جبکہ طب کا شعبہ خدمتِ انسانیت کا مقدس مشن ہے۔

گورنر سندھ نے کہا کہ صحت سہولت پروگرام کی بحالی وزیراعظم محمد شہباز شریف کے عوام دوست وڑن کی عکاس ہے۔ انہوں نے کہا کہ ہیلتھ کارڈ کا آغاز مسلم لیگ (ن) کی حکومت نے کیا تھا اور وزیراعظم شہباز شریف نے اسے دوبارہ فعال کیا تاکہ عوام کو معیاری طبی سہولیات میسر آ سکیں۔انہوں نے کہا کہ ریاست ڈاکٹرز، انجینئرز اور دیگر ماہرین کی تعلیم پر بھاری سرمایہ کاری کرتی ہے، لہٰذا فارغ التحصیل افراد کی ذمہ داری ہے کہ وہ قوم کی بے لوث خدمت کو اپنا شعار بنائیں۔

"طب کے شعبے میں کام کو عبادت سمجھ کر انجام دینا چاہیے کیونکہ اس پیشے کا تعلق براہِ راست انسانی جانوں سے ہے۔"گورنر سندھ نے کہا کہ پاکستان میں اعلیٰ تعلیم کے اخراجات اب بھی دنیا کے کئی ممالک کے مقابلے میں کم ہیں، جبکہ وفاقی حکومت ملک بھر میں دانش اسکولوں کا دائرہ کار وسیع کر رہی ہے اور کراچی میں بھی جلد دانش اسکول قائم کیا جائے گا۔

انہوں نے کہا کہ صحت کے شعبے میں منافع سے زیادہ خدمت کے جذبے کو فروغ دینا وقت کی اہم ضرورت ہے۔ این آئی سی وی ڈی سمیت دیگر سرکاری طبی ادارے سندھ بھر میں عوام کو مؤثر طبی سہولیات فراہم کر رہے ہیں اور صحت مند، باوقار اور فلاحی معاشرے کی تشکیل ہم سب کی مشترکہ ذمہ داری ہے۔بعد ازاں گورنر سندھ سید محمد نہال ہاشمی نے ہیلتھ کیئر ایکسپو کا تفصیلی دورہ کیا، مختلف اسٹالز کا معائنہ کیا اور جدید طبی آلات، ادویات، طبی ٹیکنالوجی اور صحت سے متعلق مصنوعات میں گہری دلچسپی کا اظہار کیا۔ انہوں نے نمائش میں شریک اداروں کی کاوشوں کو سراہتے ہوئے کہا کہ اس نوعیت کی نمائشیں جدید طبی علوم، تحقیق اور صحت کے شعبے میں جدت کے فروغ میں اہم کردار ادا کرتی ہیں۔