علی امین گنڈا پور کی پاکستان تحریک انصاف کی قیادت کو تنقید ، آڈیو پیغام

اتوار 12 جولائی 2026 20:45

پشاور(اُردو پوائنٹ اخبارتازہ ترین - این این آئی۔ 12 جولائی2026ء) سابق وزیر اعلیٰ خیبر پختونخوا علی امین گنڈاپور کا آڈیو پیغام سامنے آیا ہے جس میں انہوں نے پاکستان تحریک انصاف کی قیادت کو تنقید کا نشانہ بنایا۔علی امین گنڈاپور نے آڈیو پیغام میں وفاق کی جانب سے بلائی جانے والی آل پارٹیز کانفرنس پر تنقید کی، ملاکنڈ میں ٹیکس نفاذ اور پی ٹی آئی کی اے پی سی میں شرکت پر برہمی کا اظہار کیا۔

(جاری ہے)

انہوں نے کہا کہ مسلم لیگ(ن)اور پیپلز پارٹی سمیت وفاقی حکومت میں شامل پارٹیوں نے ملاکنڈ میں ٹیکس لگایا، وفاق اے پی سی بلا کر ملبہ ہمارے اوپر ڈال رہا ہے کہ صوبائی حکومت اقدامات کرے، جن لوگوں نے عمران خان اور پارٹی کو ووٹ دیا، ہم ان کو وفاق کی جھولی میں ڈال رہے ہیں۔انہوںنے کہاکہ پی ٹی آئی میں یہ کون اور کس طرح کے فیصلے کر رہا ہے، کس کی مشاورت سے اے پی سی میں گئی ملاکنڈ میں یہ ٹیکس 2018 کی نگراں حکومت کے دور میں لگا دیا گیا تھا، پی ٹی آئی حکومت نے پہلے کابینہ اجلاس میں یہ ایشو اٹھا کر اسی وقت ٹیکس ختم کر دیا تھا۔سابق وزیر اعلیٰ کے پی نے کہا کہ پارٹی، نظریہ اور ان لوگوں پر رحم کھائیں جنہوں نے آپ کو پارلیمنٹ تک پہنچایا۔