Live Updates

وفاقی وزیر اطلاعات عطائ اللہ تارڑ اور سی پی این ای میں اخباری صنعت کے مسائل کے حل پر اتفاق

منگل 14 جولائی 2026 20:17

اسلام آباد (اُردو پوائنٹ اخبارتازہ ترین - آن لائن۔ 14 جولائی2026ء) وفاقی وزیر اطلاعات و نشریات عطاء اللہ تارڑ سے کونسل آف پاکستان نیوز پیپرز ایڈیٹرز (سی پی این ای) کے صدر کاظم خان کی قیادت میں ایک وفد نے ملاقات کی، جس میں اخباری صنعت کو درپیش مسائل، آڈٹ بیورو آف سرکولیشنز میں اصلاحات، میڈیا ہاؤسز کے واجبات، نیوز ایجنسیوں کے بجٹ، ڈمی اخبارات اور دیگر اہم امور پر تفصیلی تبادلہ خیال کیا گیا۔

ملاقات میں دونوں فریقوں نے اے بی سی کے نظام کو جدید، شفاف اور مؤثر بنانے کے لیے اصلاحات پر اتفاق کیا۔وفاقی وزیر اطلاعات و نشریات عطائ اللہ تارڑ نے کہا کہ حکومت آزاد، ذمہ دار اور مضبوط پرنٹ میڈیا پر مکمل یقین رکھتی ہے اور صحافتی اداروں کو درپیش جائز مسائل کے حل کے لیے تمام متعلقہ فریقوں سے مسلسل مشاورت جاری رکھی جائے گی۔

(جاری ہے)

انہوں نے کہا کہ آڈٹ بیورو آف سرکولیشنز کے نظام کو جدید تقاضوں سے ہم آہنگ کرنا وقت کی اہم ضرورت ہے تاکہ اخبارات کی اشاعت اور سرکولیشن کے نظام میں شفافیت، اعتماد اور مؤثریت کو مزید فروغ دیا جا سکے۔

وفاقی وزیر نے اس عزم کا اظہار کیا کہ اے بی سی میں ضروری اصلاحات، میڈیا ہاؤسز کے واجبات کی بروقت ادائیگی، نیوز ایجنسیوں سے متعلق معاملات اور اخباری صنعت کو درپیش دیگر مسائل کو ترجیحی بنیادوں پر حل کیا جائے گا۔ انہوں نے کہا کہ حکومت صحافتی اداروں کے ساتھ ہر ممکن تعاون جاری رکھے گی تاکہ آزاد اور ذمہ دار صحافت کو فروغ دیا جا سکے۔ ملاقات میں کونسل آف پاکستان نیوز پیپرز ایڈیٹرز (سی پی این ای) کے وفد نے نئی پرنسپل انفارمیشن آفیسر رئیسہ عادل کو ذمہ داریاں سنبھالنے پر مبارکباد پیش کی اور اس امید کا اظہار کیا کہ ان کی قیادت میں وزارت اطلاعات اور اخباری صنعت کے درمیان باہمی تعاون مزید مضبوط ہوگا۔

وفد نے سبکدوش ہونے والے پرنسپل انفارمیشن آفیسر مبشر حسن کی خدمات کو بھی سراہا اور قومی اطلاعاتی نظام کے لیے ان کی پیشہ ورانہ خدمات پر انہیں خراجِ تحسین پیش کرتے ہوئے مستقبل کے لیے نیک خواہشات کا اظہار کیا۔ملاقات میں وفاقی سیکریٹری اطلاعات و نشریات اشفاق احمد خلیل بھی موجود تھے، جبکہ دونوں جانب سے اس بات پر اتفاق کیا گیا کہ میڈیا انڈسٹری کو درپیش مسائل کے حل، صحافتی اداروں کی مضبوطی اور معلومات کی شفاف ترسیل کے لیے حکومت اور میڈیا تنظیموں کے درمیان قریبی رابطہ اور مشاورت کا سلسلہ آئندہ بھی جاری رکھا جائے گا۔