نوجوان پاکستان کا قیمتی قومی اثاثہ ہیں، ہنرمندی ہی ترقی اور خوشحالی کی حقیقی ضمانت ہی: وزیراعظم

اسلام آباد (اُردو پوائنٹ اخبارتازہ ترین - آن لائن۔ 14 جولائی2026ء) وزیراعظم محمد شہباز شریف نے 15 جولائی 2026 کو منائے جانے والے عالمی یومِ نوجوانانِ ہنرمندی و پیشہ ورانہ مہارت کے موقع پر اپنے پیغام میں کہا ہے کہ پاکستان اپنے نوجوانوں کی صلاحیتوں، عزم اور استعداد کو قومی ترقی کا سب سے قیمتی سرمایہ سمجھتا ہے۔ انہوں نے کہا کہ جدید ٹیکنالوجی، مصنوعی ذہانت اور تیزی سے بدلتی عالمی معیشت کے دور میں عالمی معیار کی مہارتیں ہی نوجوانوں کی کامیابی اور ملک کی معاشی خوشحالی کی بنیاد ہیں۔

وزیراعظم شہباز شریف نے اپنے خصوصی پیغام میں کہا کہ پاکستان آج دنیا بھر کے ممالک کے ساتھ مل کر نوجوانوں کی ہنرمندی اور پیشہ ورانہ مہارت کے عالمی دن پر نوجوانوں کی صلاحیتوں کو خراجِ تحسین پیش کرتا ہے۔

(جاری ہے)

انہوں نے کہا کہ پاکستانی نوجوان ملک کا قیمتی قومی اثاثہ ہیں، جو جدید تعلیم، پیشہ ورانہ تربیت، مضبوط کردار اور فنی مہارتوں کے ذریعے ملک کو ترقی کی نئی منزلوں کی جانب لے جانے کی صلاحیت رکھتے ہیں۔

وزیراعظم نے کہا کہ موجودہ دور میں ڈیجیٹل جدت، مصنوعی ذہانت، ابھرتی ہوئی ٹیکنالوجیز اور تیزی سے بدلتی عالمی معیشت روزگار کے نئے مواقع پیدا کر رہی ہیں، اس لیے عالمی معیار کی مہارتوں کا حصول ہر نوجوان کے لیے ناگزیر ہو چکا ہے۔انہوں نے کہا کہ حکومت نے نیشنل ووکیشنل اینڈ ٹیکنیکل ٹریننگ کمیشن کو ایک جدید، متحرک اور مستقبل کی ضروریات سے ہم آہنگ قومی ادارے میں تبدیل کرنے کے لیے مؤثر اقدامات کیے ہیں، تاکہ نوجوانوں کو عالمی معیار کی تربیت، بین الاقوامی سطح پر تسلیم شدہ اسناد اور صنعت کی ضروریات کے مطابق مہارتیں فراہم کی جا سکیں۔

وزیراعظم کے مطابق موجودہ مالی سال میں نیوٹیک کے ذریعے تکنیکی اور پیشہ ورانہ تعلیم کے فروغ کے لیے نمایاں بجٹ مختص کیا گیا ہے، جو حکومت کے اس عزم کا مظہر ہے کہ ہنرمندی کو پاکستان کی معاشی ترقی، روزگار کے فروغ اور برآمدات میں اضافے کا بنیادی ستون بنایا جائے۔انہوں نے کہا کہ حکومتی پالیسی کا مقصد صرف ملازمتیں فراہم کرنا نہیں بلکہ ایسے ہنر مند، کاروباری اور پیشہ ور افراد تیار کرنا بھی ہے جو نئی صنعتوں، برآمدات، قومی پیداوار اور پائیدار معاشی ترقی میں مؤثر کردار ادا کر سکیں۔

وزیراعظم نے کہا کہ حکومت صنعتی شعبے، نجی اداروں اور بین الاقوامی شراکت داروں کے ساتھ تعاون کو مزید وسعت دے رہی ہے تاکہ پاکستانی افرادی قوت عالمی معیار کے مطابق تربیت حاصل کرے اور بین الاقوامی منڈیوں میں کامیابی سے مقابلہ کر سکے۔انہوں نے اس بات پر بھی زور دیا کہ حکومت بلاامتیاز مرد و خواتین کو یکساں مواقع فراہم کرنے کے لیے پرعزم ہے، تاکہ ہر نوجوان اپنی صلاحیتوں کو بروئے کار لا کر قومی ترقی میں اپنا کردار ادا کر سکے۔

اپنے پیغام کے اختتام پر وزیراعظم شہباز شریف نے کہا کہ وفاقی و صوبائی حکومتوں، تربیتی اداروں، نجی صنعتوں اور دیگر شراکت داروں کی مشترکہ کاوشوں سے پاکستانی ہنر مند افرادی قوت عالمی سطح پر قابلیت، جدت اور اعتماد کی علامت بنے گی۔انہوں نے قوم پر زور دیا کہ وہ اس عزم کا اعادہ کرے کہ نوجوانوں کی صلاحیتوں کو قومی خوشحالی، معاشی استحکام اور روشن مستقبل میں تبدیل کرنے کے لیے اجتماعی کوششیں جاری رکھی جائیں گی۔