Live Updates

ایران پر امریکی حملہ فی الحال ٹل گیا، ٹرمپ کا ایران پر ممکنہ حملہ مؤخر کرنے کا اعلان

ایران اور خطے کے دیگر ممالک کی جانب سے موصول ہونے والی درخواستوں کے بعد امریکہ نے فوری فوجی کارروائی مؤخر کرنے کا فیصلہ کیا ہے؛ امریکی صدر کا بیان

ساجد علی اتوار 2 اگست 2026 12:27

ایران پر امریکی حملہ فی الحال ٹل گیا، ٹرمپ کا ایران پر ممکنہ حملہ مؤخر ..

واشنگٹن (اُردو پوائنٹ اخبارتازہ ترین۔ 03 اگست 2026ء) امریکی صدر ڈونلڈ ٹرمپ نے ایران پر ممکنہ فوجی حملہ مؤخر کرنے اور ویک اینڈ پر مجوزہ کارروائی کا منصوبہ منسوخ کرنے کا اعلان کر دیا، صدر ٹرمپ کے مطابق یہ فیصلہ ایران اور خطے کے متعدد ممالک کی درخواست پر کیا گیا، جبکہ سعودی عرب سمیت علاقائی قیادت کی جانب سے بھی کشیدگی کم کرنے اور سفارتی حل پر زور دیا گیا تھا۔

اس حوالے سے صدر ٹرمپ نے اپنے بیان میں کہا کہ ایران اور خطے کے دیگر ممالک کی جانب سے موصول ہونے والی درخواستوں کے بعد امریکہ نے فوری فوجی کارروائی مؤخر کرنے کا فیصلہ کیا ہے، یہ اقدام دنیا کے مستقبل، خطے کے امن اور ایران کی بقا کو مدنظر رکھتے ہوئے کیا گیا ہے۔ انہوں نے کہا کہ اسرائیل نے بھی ممکنہ حملہ مؤخر کرنے پر اتفاق کیا ہے، تاہم اگر حالات نے تقاضا کیا تو امریکا اور اس کے اتحادی فیصلہ کن اور مؤثر کارروائی کی مکمل صلاحیت رکھتے ہیں۔

(جاری ہے)

اس سے قبل سعودی ولی عہد و وزیراعظم شہزادہ محمد بن سلمان اور امریکی صدر ڈونلڈ ٹرمپ کے درمیان ٹیلی فونک رابطہ بھی ہوا، جس میں مشرقِ وسطیٰ کی تازہ صورتحال اور بڑھتی ہوئی کشیدگی پر تفصیلی تبادلہ خیال کیا گیا، سعودی ولی عہد نے ایران کے خلاف ممکنہ امریکی فوجی کارروائی پر تشویش کا اظہار کرتے ہوئے صدر ٹرمپ پر زور دیا کہ خطے میں کشیدگی کم کرنے، مذاکرات کو موقع دینے اور جنگ سے گریز کی پالیسی اختیار کی جائے تاکہ مزید عدم استحکام سے بچا جا سکے۔