پاک، سعودی عرب اور ترکیہ کا دفاعی معاہدہ خوش آئند ہے، مفتی محمد کریم خان

پیر 10 اگست 2026 20:26

لاہور (اُردو پوائنٹ اخبارتازہ ترین - اے پی پی۔ 10 اگست2026ء) وفاق المدارس الاسلامیہ الرضویہ پاکستان کے سربراہ اور قومی پیغام امن کمیٹی کے رکن ڈاکٹر مفتی محمد کریم خان نے کہا ہے کہ پاکستان، سعودی عرب اور ترکیہ کے درمیان دفاعی معاہدہ خوش آئند ہے۔ برادر اسلامی ممالک کے مابین مضبوط دفاعی تعاون سے باہمی تعلقات مزید مضبوط اور مستحکم ہوں گے۔ اس تاریخی دفاعی معاہدے میں دیگر برادر اسلامی ممالک کو بھی شامل کیا جائے تاکہ مسلم دنیا کے درمیان دفاع، سلامتی اور باہمی تعاون کا ایک مضبوط اور موثر نظام قائم ہو سکے۔

ان خیالات کا اظہار انہوں نے علما و مشائخ کے وفد سے گفتگو کرتے ہوئے کیا۔ وفد میں سنی اتحاد کونسل کے مرکزی ترجمان ارشد مصطفائی، تنظیمات اہلسنت پاکستان کے میڈیا کوآرڈینیٹر سید احسان گیلانی، ڈاکٹر شمس الرحمن شمس اور دیگر شامل تھے۔

(جاری ہے)

ڈاکٹر مفتی محمد کریم خان نے کہا کہ دفاعی تعاون خطے میں امن، استحکام اور سلامتی کے لیے اہم پیش رفت ہے۔

انہوں نے کہا کہ برادر اسلامی ممالک کے درمیان باہمی اعتماد، مشترکہ مفادات اور دفاعی تعاون کو فروغ دینا وقت کی اہم ضرورت ہے،موجودہ عالمی حالات میں اسلامی ممالک کو باہمی اتحاد، یکجہتی اور تعاون کو مزید فروغ دینا چاہیے۔ انہوں نے کہا کہ مسلم ممالک کے درمیان دفاعی تعاون کا مقصد کسی ملک کے خلاف جارحیت نہیں بلکہ اپنی خودمختاری، قومی سلامتی اور علاقائی امن کا تحفظ ہونا چاہیے۔

انہوں نے کہا کہ دفاعی معاہدہ امت مسلمہ کے لیے امید کی ایک کرن ہے،اس معاہدے سے تینوں ممالک کے درمیان برادرانہ تعلقات مزید مستحکم ہوں گے اور باہمی تعاون کے نئے راستے کھلیں گے۔ انہوں نے کہا کہ اسلامی دنیا کے دیگر ممالک کو بھی اس دفاعی تعاون کے دائرے میں شامل کیا جائے تاکہ ایک دوسرے کی خودمختاری کا احترام کرتے ہوئے مشترکہ دفاع اور سلامتی کے لیے موثر حکمتِ عملی تشکیل دی جا سکے،مسلم ممالک کو اپنی صفوں میں اتحاد پیدا کرنے اور باہمی اختلافات کو مذاکرات اور افہام و تفہیم کے ذریعے حل کرنے کی ضرورت ہے۔ انہوں نے مزید کہا کہ اسلامی ممالک کے درمیان مضبوط دفاعی تعاون خطے میں طاقت کا توازن برقرار رکھنے اور امن کے استحکام کے لیے سنگِ میل ثابت ہو سکتا ہے۔