نیتن یاہو نے ممدانی کو حزب اللہ اور خامنہ ای کے برابر کھڑا کردیا، تصویر وائرل

تل ابیب (اُردو پوائنٹ اخبارتازہ ترین - این این آئی۔ 18 اگست2026ء) اسرائیلی وزیراعظم بنیامین نیتن یاہو کی جماعت لیکوڈ نے ایک انتخابی تشہیری بل بورڈ کے ذریعے نیویارک کے میئر زہران ممدانی کو ایرانی رہنما مجتبی خامنہ ای، لبنانی حزب اللہ کے سربراہ نعیم قاسم اور ترکیہ صدر رجب طیب اردوان کے ساتھ ایک ہی تصویر میں پیش کیا ہے۔یہ بل بورڈ تل ابیب کے وسط میں نصب کیا گیا، جس پر نیتن یاہو کی دائیں بازو کی جماعت لیکوڈ کا انتخابی نشان موجود تھا۔

اس پر لکھا تھا:وہ چاہتے ہیں کہ نیتن یاہو ہار جائیں،انہیں کامیاب نہ ہونے دیں۔اس تشہیری مہم کا مقصد اسرائیلی ووٹروں کو لیکوڈ کے حق میں ووٹ دینے پر آمادہ کرنا اور انہیں یہ باور کرانا ہے کہ نیتن یاہو کے خلاف ووٹ دینے کی صورت میں اسرائیل کو ممکنہ سکیورٹی خطرات کا سامنا ہوسکتا ہے۔

(جاری ہے)

آئندہ انتخابات اکتوبر میں متوقع ہیں اور یہ 7 اکتوبر 2023 کے حملوں کے بعد ہونے والے پہلے انتخابات ہوں گے۔

نیتن یاہو کی کوشش ہے کہ جولائی میں اسرائیلی پارلیمان کنیسٹ کی تحلیل کے بعد بھی ان کی سخت گیر دائیں بازو کی اتحادی حکومت اقتدار میں برقرار رہے۔نیتن یاہو نے گزشتہ اتوار کو اس تشہیری بل بورڈ کی تصویر اپنے سوشل میڈیا اکانٹس پر بھی شیئر کی۔ اس کے ساتھ ایک ویڈیو بھی جاری کی گئی، جس میں ممدانی کے نیتن یاہو کو جنگی مجرم قرار دینے والے بیانات شامل تھے۔

ممدانی اپنی انتخابی مہم کے آغاز ہی سے غزہ میں اسرائیلی جنگ کے شدید ناقد رہے ہیں۔ تاہم نیتن یاہو کے ساتھ ان کی لفظی جنگ گزشتہ ماہ اس وقت مزید شدت اختیار کر گئی، جب ممدانی نے اسرائیلی وزیراعظم کو جنگی مجرم قرار دیتے ہوئے کہا کہ ان کی جگہ دی ہیگ میں ہے۔نیویارک کے میئر نے امریکی حکام سے یہ بھی مطالبہ کیا کہ اگر نیتن یاہو ستمبر میں اقوام متحدہ کی جنرل اسمبلی کے اجلاس میں شرکت کے لیے نیویارک آئیں تو امریکی حکام ان کے خلاف عالمی فوجداری عدالت کا جاری کردہ گرفتاری وارنٹ نافذ کریں۔

اس کے جواب میں نیتن یاہو نے ممدانی پر نفرت پھیلانے اور نیویارک میں مختلف مذہبی گروہوں کو ایک دوسرے کے خلاف اکسانے کا الزام عائد کیا۔نیتن یاہو نے یہ خدشہ بھی ظاہر کیا کہ امریکہ میں اسرائیل کی روایتی دو جماعتی سیاسی حمایت کو ممدانی کے ساتھ اتحاد رکھنے والے ترقی پسند ڈیموکریٹس سے خطرہ لاحق ہوگیا ہے۔یہ انتخابی مہم ایسے وقت میں سامنے آئی ہے ،جب اسرائیل میں حالیہ کئی عوامی جائزوں کے مطابق نیتن یاہو اور ان کے حکومتی اتحاد کی مقبولیت میں کمی آئی ہے۔

موجودہ کنیسٹ میں لیکوڈ کے پاس 32 نشستیں ہیں، جبکہ حالیہ سروے اسے صرف 21 سے 24 نشستیں ملنے کی پیش گوئی کر رہے ہیں۔اس کے باوجود نیتن یاہو خود کو ایک ایسے مضبوط رہنما کے طور پر پیش کر رہے ہیں جس نے ان کے بقول ایران، غزہ میں حماس اور لبنان میں حزب اللہ کو قابو کیا۔