حکومتی کمیٹی کو جماعت اسلامی کی 6تجاویز پیش، مذاکرات جمعرات کو دوبارہ ہوں گے

اسلام آباد(اُردو پوائنٹ اخبارتازہ ترین - این این آئی۔ 07 ستمبر2026ء) حکومتی کمیٹی سے پٹرولیم لیوی کے حوالے سے مذاکرات میں جماعت اسلامی نے 6تجاویز پیش کردیں جبکہ مذاکرات جمعرات کو دوبارہ ہوں گے۔ تفصیلات کے مطابق وفاقی دارالحکومت میں پٹرولیم لیوی کے خاتمے کے معاملے پر حکومت اور جماعت اسلامی کے درمیان مذاکرات کا پہلا دور ختم ہوگیا۔حکومتی وفد کی قیادت وفاقی وزیر منصوبہ بندی احسن اقبال جبکہ جماعت اسلامی کے وفد نے مذاکرات میں شرکت کی۔

مذاکرات کے بعد مشترکہ پریس کانفرنس میں احسن اقبال نے کہا کہ حکومت نے جماعت اسلامی کو مذاکرات کی دعوت دی اور اس سے پٹرولیم لیوی کے حوالے سے تجاویز طلب کی تھیں۔وفاقی وزیر برائے منصوبہ بندی و ترقی نے کہا کہ حکومت کبھی نہیں چاہتی کہ عوام پر اضافی بوجھ پڑے، تاہم دنیا بھر کی معیشتیں ایران جنگ سے متاثر ہوئی ہیں اور بعض مواقع پر حکومت مجبور ہوجاتی ہے۔

(جاری ہے)

احسن اقبال نے کہا کہ جماعت اسلامی نے اپنی تجاویز حکومت کے سامنے پیش کردی ہیں، جن کا متعلقہ اداروں کی رائے کی روشنی میں جائزہ لیا جائے گا۔وفاقی وزیر نے کہا کہ اگر جماعت اسلامی کی کوئی تجویز ناقابلِ عمل ہوئی تو اس سے بھی جماعت اسلامی کو آگاہ کیا جائے گا، متعلقہ اداروں سے رائے لینے کے بعد حکومت اور جماعت اسلامی کے درمیان جمعرات کو دوبارہ مذاکرات ہوں گے۔

مذاکراتی کمیٹی میں شامل مشیر وزیراعظم رانا ثناء اللہ سے صحافی نے صوبوں سے متعلق سوال کیا کہ جس کے جواب میں انہوںنے کہاکہ پٹرولیم لیوی سے متعلق ہی سوال کریں۔دوسری جانب جماعت اسلامی کے نائب امیر لیاقت بلوچ نے کہا کہ پٹرولیم لیوی کے خاتمے اور عوام کو ریلیف کی فراہمی کے لیے حکومت کے ساتھ مذاکرات کا پہلا دور خوشگوار ماحول میں ہوا ہے، تاہم مذاکرات کے دوران جماعت اسلامی کے دھرنے، احتجاج اور جلسے جاری رہیں گے۔

لیاقت بلوچ نے کہا کہ پٹرولیم لیوی کے حوالے سے جماعت اسلامی نے مذاکراتی ٹیم تشکیل دی تھی، جبکہ حکومتی کمیٹی کا مطالبہ تھا کہ دھرنے مخر کر دیے جائیں، تاہم جماعت اسلامی نے مذاکرات کو ترجیح دی ہے، ہمارا اصل مقصد عوام کو ریلیف دلانا ہے اور توقع ہے کہ مذاکرات کے اگلے رانڈ میں عوام کو ریلیف ملے گا۔انہوں نے کہا کہ حکومت نے لیوی کے نام پر عوام سے زیادہ پیسہ وصول کیا، پٹرول اور ڈیزل کی قیمت میں تقریباً 80روپے لیوی ہے، اسے ختم کیا جائے۔

عالمی مارکیٹ کے تناسب سے قیمتوں کے تعین کا علم ہمیں بھی ہے، ہم کوئی ناجائز مطالبہ نہیں کر رہے بلکہ عوام کو ریلیف دینے کی بات کر رہے ہیں۔نائب امیر جماعت اسلامی نے کہا کہ جماعت اسلامی نے حکومتی ٹیم کے سامنے 6تجاویز رکھی ہیں، جن پر عمل درآمد سے عوام کو ریلیف مل سکتا ہے۔ انہوں نے مطالبہ کیا کہ غیر ترقیاتی اخراجات میں بھی کمی کی جائے۔لیاقت بلوچ نے کہا کہ روزانہ کی بنیاد پر قیمتوں میں اضافے سے عوام مشکلات کا شکار ہیں، پٹرول پر ناجائز لیوی ختم ہونے سے سب کو ریلیف ملے گا۔ عوام کو ریلیف ملنے سے ہی معاشی پہیہ چلے گا۔