میونسپل کمیٹی ٹھٹھہ کے پنشنرز اور ملازمین کا احتجاج، نئی تنخواہوں اور پنشن کی ادائیگی کا مطالبہ

ٹھٹھہ (اُردو پوائنٹ اخبارتازہ ترین - این این آئی۔ 04 اکتوبر2026ء) میونسپل کمیٹی ٹھٹھہ کے ریٹائرڈ پنشنرز اور حاضر سروس ملازمین نے ڈسٹرکٹ آڈٹ فنڈ آفس اور پریس کلب ٹھٹھہ کے سامنے احتجاجی مظاہرہ کیا اور شدید نعرے بازی کی۔ اس موقع پر یونین رہنماں سید عنایت حسین شاہ، ریاض لطیف عباسی، راجیش راموں، محراب برفت اور عمر خشک نے خطاب کرتے ہوئے کہا کہ 2018 سے 2026 تک ریٹائرڈ ملازمین کو واجبات کی عدم ادائیگی کے باعث متعدد ملازمین بیماری اور مالی مشکلات کا شکار ہو کر انتقال کرگئے، جبکہ موجودہ ملازمین بھی شدید مالی پریشانیوں سے دوچار ہیں۔

انہوں نے کہا کہ حاضر سروس ملازمین کو پروموشن اور ترقی کے مواقع نہیں مل رہے، جبکہ حکومت کی جانب سے ہر سال تنخواہوں میں کیے جانے والے اضافے کا بھی انہیں فائدہ نہیں دیا جا رہا۔

(جاری ہے)

شدید مہنگائی کے باوجود ملازمین کو جولائی 2025 کی پرانی تنخواہ ادا کی جا رہی ہے، جس سے ان کے مسائل میں مزید اضافہ ہوگیا ہے۔مظاہرین نے کہا کہ شہر میں سوئی گیس کی نئی لائنوں کی روڈ کٹنگ کی مد میں 3 کروڑ روپے کی آمدن، ہر ماہ تقریبا 20 لاکھ روپے ٹیکس وصولی اور دیگر ماہانہ آمدنی سے تنخواہوں، پنشن، مینٹیننس اور فیول کے اخراجات پورے ہونے کے باوجود ملازمین کے جائز مسائل حل نہیں کیے جا رہے۔

انہوں نے بچت شدہ رقوم سے ٹھیکیداری بلوں کی ادائیگی اور حقیقی کام کرنے والے ملازمین کو نظر انداز کیے جانے پر بھی تشویش کا اظہار کیا۔ملازمین اور پنشنرز نے لوکل آڈٹ فنڈ ٹھٹھہ/مکلی آفس کے سامنے دھرنا دے کر شدید نعرے بازی کی اور ڈسٹرکٹ آڈٹ فنڈ افسر کی موجودگی میں اپنے مطالبات پر مشتمل یادداشت پیش کی۔ اس موقع پر آڈٹ افسر کو آگاہ کیا گیا کہ ڈائریکٹر آڈٹ فنڈ سندھ، ریجنل ڈائریکٹر حیدرآباد ڈویژن اور ڈسٹرکٹ آڈٹ فنڈ آفیسر ٹھٹھہ کی جانب سے جاری کردہ احکامات پر مکمل عملدرآمد نہیں ہو رہا۔

ملازمین نے مطالبہ کیا کہ ضلع کونسل ٹھٹھہ/مکلی، گھوڑاباری اور گھارو ٹان کمیٹی کی طرز پر میونسپل کمیٹی ٹھٹھہ کے پنشنرز اور حاضر سروس ملازمین کی تنخواہوں اور پنشن کو بھی فوری طور پر نئی شرح کے مطابق اپڈیٹ کیا جائے تاکہ وہ موجودہ مہنگائی کے دور میں اپنے اخراجات پورے کرسکیں۔اس موقع پر لوکل آڈٹ فنڈ ٹھٹھہ کے افسر نے میونسپل انتظامیہ کو پرانی تنخواہوں اور پنشن کو نئی اپڈیٹ شدہ تنخواہ و پنشن کے مطابق کرنے کے لیے سختی سے ہدایات جاری کیں، جس پر ملازمین اور پنشنرز نے آڈٹ فنڈ ٹھٹھہ کے افسر کا شکریہ ادا کیا۔

دوسری جانب ملازمین کی جانب سے ڈپٹی کمشنر ٹھٹھہ کو بھی مطالبات پر مشتمل یادداشت پیش کی گئی۔ ملازمین اور پنشنرز نے آل پاکستان لوکل گورنمنٹ ورکرز فیڈریشن سندھ کے صدر سید ذوالفقار علی شاہ اور جنرل سیکریٹری محمد اکرم راجپوت کا بھی شکریہ ادا کیا اور ملازمین کے مسائل کے حل کے لیے ان کے تعاون کو سراہتے ہوئے ان کے لیے نیک خواہشات اور دعاں کا اظہار کیا۔