مالی بحران : اگلے سالوں میں یورو زون میں توسیع نہیں ہو گی : یورپی کمیشن،ایسی کوئی امید نہیں کہ آئندہ چند برسوں میں کوئی نیا ملک یورو زون میں شامل ہو، نائب صدر یورپی کمیشن

بدھ 30 دسمبر 2015 09:24

فرینکفرٹ (اُردو پوائنٹ اخبارآن لائن۔30دسمبر۔2015ء)یورپی یونین کے کمیشن نے کہا ہے کہ مستقبل میں یورو زون میں کسی قسم کی توسیع نہیں کی جائے گی۔ یاد رہے کہ اس وقت یونین کے 28 رکن ملکوں میں سے 19 ریاستیں یورپی کرنسی اتحاد میں شامل ہیں۔یورپی کمیشن کے نائب صدر والدِس دومبروفسکس نے اپنے ایک انٹرویو میں کہا کہ یورو زون کو در پیش طویل مالیاتی بحران کے باعث یونین کے رکن کئی ممالک اپنے ان ارادوں میں قدرے کمزور پڑ گئے ہیں کہ انہیں بھی دیگر ریاستوں کی طرح یورپی مشترکہ کرنسی یورو میں شامل ہو جانا چاہیے۔

جرمن خبر رساں ادارے کے مطابق والدِس دومبروفسکس نے کہا، ”ایسی کوئی امید نہیں کہ آئندہ چند برسوں میں کوئی نیا ملک یورو زون میں شامل ہو گا۔ “ دومبروفسکس نے ، جو یورپی کمیشن کے نائب صدر ہونے کے علاوہ یونین کے مشترکہ کرنسی یورو اور سماجی مکالمت سے متعلقہ امور کے نگران کمشنر بھی ہیں ، اس انٹرویو میں کہا، ”کسی بھی ملک کے لیے یورو میں شمولیت سے قبل کرنسی کی طے شدہ شرح تبادلہ کے یورپی نظام میں شامل ہونا لازمی ہوتا ہے۔

(جاری ہے)

یہ یورپی ایکسچینج ریٹ میکینزم ERM ایک طرح سے یورو میں شمولیت سے پہلے ایک انتظار گاہ کا کام کرتا ہے۔ اس وقت یونین کی رکن ایسی کوئی ریاست نہیں ہے ، جو اس مرحلے میں ہو اور یورو میں اپنی رکنیت کے انتظار میں ہو۔ “