تحریک انصاف کے فیاض الحسن چوہان پر پروگراموں میں آنے پر پابندی عائد

پیمرا کی جانب سے نجی ٹی وی کو اکبر ایس بابر کو ایک ماہ میں ٹی وی پروگرام میں موقف پیش کرنے کا موقع دینے کی ہدایت

جمعہ 17 نومبر 2017 23:40

اسلام آباد(اُردو پوائنٹ اخبار آن لائن۔ ہفتہ 18 نومبر 2017ء)پاکستان الیکٹرانک میڈیا ریگولیٹری اتھارٹی (پیمرا) کو معروف نجی ٹی وی چینل نے آگاہ کیا ہے کہ اس نے پی ٹی آئی کے ڈپٹی سیکریٹری اطلاعات فیاض الحسن چوہان کی جانب سے تحریک انصاف کے بانی راہنما اکبر ایس بابر پر مریم نوازشریف کے ساتھ رابطوں کا الزام جھوٹ ثابت ہونے پراپنے پروگرام میں آنے پر پابندی لگادی ہے۔

پیمرا نے متعلقہ ٹی وی کو حکم دیا ہے کہ ایک ماہ کے اندر شکایت گزار اکبر بابر کا پوراموقف اپنے متعلقہ پروگرام میں نشرکرے۔ پیمرا نے یہ کاروائی اکبر ایس بابر کی تحریری شکایت پر کی جو انہوں نے فروری 2017ء میںدائر کی تھی۔ شکایت میںکہاگیا تھاکہ فیاض الحسن چوہان نے نجی ٹی وی (ڈان) کے پروگرام میں ان پر یہ بے بنیاد اور جھوٹا الزام لگایا کہ مریم نوازان سے رابطے میں تھیں اور یہ دعوی بھی کیا کہ انہیں یہ بات ایک ٹی وی پروڈیوسر نے خود بتائی ہے۔

(جاری ہے)

متعلقہ پروڈیوسر نے فیاض الحسن چوہان کے دعوے کو غلط بیانی اور جھوٹ قرار دیا۔ پیمرا کو متعلقہ نجی ٹی وی نے بتایا کہ اس جھوٹ کی وجہ سے فیاض الحسن چوہان کی گزشتہ کئی ماہ سے تمام پروگراموں میں آنے پر پابندی لگائی گئی ہے۔ پیمرا نے متعلقہ ٹی وی کو ہدایت کی کہ16دسمبر2017ء سے قبل ایک ماہ کے مدت کے اندراکبر بابر کو بھی اسی پروگرام میں موقف پیش کرنے کا پورا موقع دیاجائے جس میں الزام عائد کیاگیا تھا۔