Garmiyon Ka Aala Mashroob Sekanjabin - Article No. 2694

گرمیوں کا موسم خاصا طویل اور تکلیف دہ ہوتا ہے۔ہم میں سے اکثر سادہ پانی پینے کے بجائے فزی ڈرنکس استعمال کرتے ہیں۔شربتوں میں مصنوعی شکر کا استعمال بڑھا دیتے ہیں بلاشبہ مٹھاس فوری طور پر توانائی بحال کرتی ہے۔جب ہم لیموں پانی سادہ پیتے ہیں تو پیاس بجھتی ہے لیکن جب اسی پانی میں شکر،حسب پسند نمک اور کٹی ہوئی برف کے ساتھ چند پتے پودینے کے شامل کر لیتے ہیں تو اسے سکنجبین کا نام دیا جاتا ہے۔یہ آپ کو سن اسٹروک سے محفوظ رکھنے والا مشروب ہے۔بظاہر دیکھا جائے تو یہ سہل ترین مشروب ہے جسے ایک دس بارہ برس کا بچہ بھی خود بنا سکتا ہے۔تو پھر بچوں کو مصنوعی ذائقوں والے بازاری مشروبات پینے کا عادی بنانا کہاں کی دانشمندی ہے۔کبھی کبھار منہ کا ذائقہ بدلنے کے لئے یا گھر سے دور ہونے کی صورت میں ان تیار مشروبات سے فیض اٹھایا جانا چاہئے ورنہ دور اندیش مائیں تو سکنجبین مشروب دیا کرتی ہیں۔

(جاری ہے)

غذائی فوائد
سب سے پہلا اور موٴثر ترین فائدہ نظام ہاضمہ کی درستگی ہے۔معدے کی تیزابیت،ثقیل کھانوں کے بعد سینے میں جلن اور اپھارے کی کیفیت میں یہ مشروب سوزش کو دور کر دیتا ہے۔پودینہ ایسی ورسٹائل بوٹی ہے جو ہزاروں برس سے معدہ اور آنتوں کی تکلیف میں موٴثر ثابت ہوتی ہے۔کھانسی اور بخار میں بھی یہ بہت مفید اثر رکھتا ہے۔یہ ماں بننے والی خواتین کو مارننگ سک نیس سے نجات اور طبیعت بحال کر دیتے ہیں۔نوزیا کی کیفیت کو بھی زائل کر دیتی ہے۔
سر درد کے علاج کے لئے
پودینے کی خوشبو سونگھنا اروما تھراپی کا موٴثر طریقہ ہے۔گرمی کے موسم میں درد سر کے خاتمے کے لئے پودینے کی خوشبو سونگھنا بہت حد تک مفید ہو سکتا ہے اور اگر آپ سکنجبین پی لیتے ہیں تو دردِ شقیقہ (Migraine) سے بچاؤ ممکن ہو جاتا ہے۔جنوبی ایشیا کے ملکوں میں لیموں کے رس میں پودینے کو کچل کر ملا کے کھانے کی روایت ہے۔برصغیر میں پودینے کی چٹنی مختلف،کھچڑیوں اور اسنیکس کے ساتھ اہتمام سے بنتی ہے۔
جلد کو معتدل رکھنے کے لئے
وٹامن سے بھرپور سکنجبین جلد کی صحت پر خوشگوار اثر مرتب کرتی ہے۔یوں تو ہم کنسیلر اور BB کریم جیسی کیمیائی عناصر سے تیار شدہ سہولتوں سے مستفیض ہوا کرتے ہیں تاہم قدرتی طریقہ علاج کے لئے یہ مشروب جھریوں سے پاک اور بڑھتی ہوئی عمر کے اثرات کے علاوہ موسم گرما میں ہونے والی مختلف بیماریوں اور داغ دھبوں سے نجات دلاتا ہے۔
گردوں کی پتھری دور کرتا ہے
سکنجبین کے خواص میں ایک اہم ترین خاصیت گردوں کی صفائی کا عمل ہے۔گردے ہمارا بلڈ پریشر کنٹرول کرتے ہیں یہ تیزابیت اور اساس کا توازن برقرار رکھتے ہیں اور جسمانی فلٹر کا کام بھی سر انجام دیتے ہیں۔اگر آپ لیمونیٹڈ تھراپی کریں یعنی روزانہ سکنجبین پئیں گے تو گردوں پر کام کا بوجھ نہیں پڑے گا۔ہائی بلڈ پریشر کے مریض اس مشروب میں نمک اور شکر کا توازن رکھیں یعنی مقدار میں زیادتی نہ کریں تو بہترین نتائج حاصل کر سکتے ہیں۔
دمے کے مریضوں کے لئے
پودینہ افسردگی اور پژمردگی جیسے جذبات کو زائل کرنے کا مجرب نسخہ ہے جبکہ سکنجبین کے ساتھ یہ سانس کی تکالیف کو دور کرنے اور اینٹی بیکٹیریل خاصیتوں کو متحرک کرتا ہے۔گلے کی خراش اور ٹانسلز کی صورت میں بھی مریض کو افاقہ ہوتا ہے۔
100 گرام سکنجبین کے غذائی فوائد
کیلوریز 69
کولیسٹرول 0
کاربوہائیڈریٹس 10 فیصد
غذائی فائبر 9.8 گرام
پروٹین 4.1 گرام
آئرن 12.5 گرام
وٹامن سی 66.3 ملی گرام
پوٹاشیم 138 ملی گرام
کیلشیم 2.25 ملی گرام
فولیٹ 3 فیصد ملی گرام
میگنیزیئم 8 ملی گرام
کاپر 0.2 ملی گرام