ملک میں اعصابی امراض کی روک تھام ضروری ہے،نیورو کریٹیکل کئیر، کا فروغ ناگزیر ہے پروفیسر اقبال چوہدری

کراچی (اُردو پوائنٹ اخبارتازہ ترین - این این آئی۔ 08 مارچ2019ء) پاکستان میں فالج کے مریضوں میں سے 22 فیصد افراد معزوری یا ہلاکت کا شکار ہوجاتے ہیں جس کہ اہم وجہ اسپتالوں میں نیورو کریٹیکل کئیر(Neurocritical Care)شعبے کا نہ ہونا یا غیر معیاری ہونا ہے، کراچی کے متعدد بڑے اسپتالوں میں انتہائی نگہداشت کے شعبہ جات میں نیورو کریٹیکل کئیر یونٹ کا قیام اعصابی بیماریوں کی روک تھام کے لیے بے حد ضروری ہے۔

ان خیالات کا اظہار پاکستانی اور آسٹریا کے ماہرین نے ڈاکٹر پنجوانی سینٹر برائے مالیکیو لر میڈیسن اور ڈرگ ریسرچ (پی سی ایم ڈی) کے زیرِ اہتمام جمعرات اور جمعہ کو منعقدہ دو روزہ نیورو کریٹیکل کئیر ٹیچنگ کورس کے انعقاد کے دورں کہی، ڈاکٹر پنجوانی سینٹر نے اس کورس کا انعقاد آسٹریا کی میڈیکل یونیورسٹی انسبرک کے اے ایس ای اے یونی نیٹ کے تعاون سے کیا۔

(جاری ہے)

ڈاکٹر پنجوانی سینٹر کے سربراہ پروفیسر ڈاکٹر محمد اقبال چوہدری نے ٹیچنگ کورس کا افتتاح کیا، کورس کا اختتام جمعہ کی شام اختتامی تقریب سے ہوا، کورس میں آسٹریا کے معروف ماہرین یونیورسٹی انسبرک کے پروفیسر ڈاکٹر ریچ شمیزہارڈ اور ڈاکٹر ریمنڈ ہیلبک نے خصوصی خطاب کیا جبکہ ڈاکٹر پنجوانی سینٹر کے ڈاکٹر سید طارق معین نے میزبانی کے فرائض انجام دیے۔

پروفیسر اقبال چوہدری نے کہا پاکستان میں کراچی سمیت ملک کے دیگر شہروں کے اسپتالوں میں انتہائی نگہداشت کے شعبہ جات میں نیورو کریٹیکل کئیر یونٹ کا قیام اعصابی بیماریوں کی روک تھام کے لیے بے حد ضروری ہے، ملک میں فالج کے مریضوں کی بڑی تعداد معزوری یا ہلاکت کا شکار ہوجاتی ہے جس کہ اہم وجہ اسپتالوں میں نیورو کریٹیکل کئیر شعبے کی عدم موجودگی ہے، پروفیسر اقبال چوہدری نے ڈاکٹر پنجوانی سینٹر کی گراں قدر تحیققی و علمی سرگرمیوں پر بھی روشنی ڈالی۔

پروفیسر ریچ شمیزہارڈ نے کہا نیورو کریٹیکل کئیر کا بنیادی کام اسپتالوں میں جان لیوا اعصابی اور اعصابی جراحی سے متعلق امراض یعنی فالج، ریڑھ کی ہڈی کی بیماریاں، دماغی رسولی، دماغی چوٹوں اور دیگر ہیمرجگ امراض سے متاثرہ مریضوں کی خصوصی نگہداشت کرناہے، انھوں نے کہا مہلک اعصابی بیماریوں میں مبتلا مریضوں کو امراض کی تشخیص اور علاج کے دوراں انتہائی نگہداشت کی ضرورت ہوتی ہے، انھوں نے کہا اس کورس میں پورے پاکستان سے صحت اور نگہداشت کے شعبے سے وابستہ چالیس ماہرین نے شرکت کی، انھوں نے اس اہم کورس کو موثر انداز میں منعقد کرنے پر ڈاکٹر پنجوانی سینٹر کے ماہرین کی کاوشوں کو سراہا۔

ڈاکٹر ریمنڈ ہیلبک نے کہا کہ متعلقہ کورس صحت بالخصوص علم اعصاب کے شعبے میں کام کرنے والے ماہرین کے لیے وضع کیا گیا تھا جس میں اعصابی امراض اور علم اعصاب سے متعلق متعدد موضوعات کا احاطہ کیا گیا تھا۔