پنجاب انسٹیٹیوٹ آف نیورو سائنسز کے سربراہ کا پرنسپل جنرل ہسپتال کے اعزاز میں استقبالیہ

لاہور(اُردو پوائنٹ اخبارتازہ ترین - این این آئی۔ 27 جولائی2019ء) ادارے عمارتوں سے نہیں باہمی تعاون و ٹیم ورک سے مضبوط ہوتے ہیں،لاہور جنرل ہسپتال اور پنجاب انسٹی ٹیوٹ آ ف نیورو سائنسز کی انتظامیہ مریضوں کی بہتر نگہداشت اور انہیں کلینیکل سروسز موثر انداز میں مہیا کرنے میں کوئی کسر اٹھا نہیں رکھیں گی،ان خیالات کا اظہار گزشتہ روز پی آئی این ایس کے سربراہ پروفیسر ڈاکٹر خالد محمود نے پی جی ایم آئی اور امیر الدین میڈیکل کالج کے نئے پرنسپل پروفیسر ڈاکٹر سردار محمد الفرید ظفر کے اعزاز میں دیے گئے استقبالیے میں گفتگو کرتے ہوئے کیا۔

انہوں نے کہا کہ گو نیورو انسٹی ٹیوٹ ایک خود مختار ادارے میں تبدیل ہو گیا ہے لیکن ایل جی ایچ کے ساتھ اس ادارے کا رشتہ یک جان دو قالب جیسا ہے جو باہمی تعاون اور فروغ کے بغیر آگے نہیں بڑھ سکتے۔

(جاری ہے)

اپنی گفتگو میں پرنسپل پی جی ایم آئی و جنرل ہسپتال پروفیسر سردار الفرید ظفر نے کہا کہ وزیر اعظم عمران خان کی صحت کی پالیسی پر عملدرآمد کرتے ہوئے ان دونوں اداروں کو مریضوں کے موثر علاج کیلئے ایک پلیٹ فارم پر ہونا ہے۔

انہوں نے کہا کہ ہسپتالوں میں تمام مریضوں کی بلا تفریق بہترین خدمت ہم سب کا مشترکہ نصب العین ہے جس میں کوئی دقیقہ فروگزاشت نہیں کیا جائے گا۔اس موقع پر پروفیسر خالد محمود نے بتایا کہ پنجاب حکومت نے پی آئی این ایس کا اکانٹ الگ کر دیا ہے اور ادارے کیلئے ایم ایس، ڈائریکٹر فنانس، اور نرسنگ سپرٹینڈنٹ سمیت 48نئی آسامیوں کی بھی منظوری دے دی ہے جس سے اس ادارے کی کارکردگی مزید بہتر ہو جائے گی،انہوں نے پرنسپل پروفیسر الفرید ظفر کی کامیابی کیلئے نیک خواہشات کا اظہار کیا اور انہیں اپنے ہر ممکن تعاون کا یقین دلایا۔

تقریب میں میڈیکل سپرنٹنڈنٹ ڈاکٹر محمود صلاح الدین نے بھی گفتگو کرتے ہوئے کہا کہ وہ انتظامی سربراہ کے طور پر دونوں اداروں سے مکمل ہم آہنگی رکھیں گے۔تقریب میں پروفیسر آغا شبیر علی،پروفیسر محمد معین،پروفیسر منیزہ سعید،پروفیسر محمد نذیر،پروفیسر جودت سلیم،پروفیسر رضوان مسعود بٹ،پروفیسر آصف بشیر، ڈاکٹر محسن ظہیر اورڈاکٹر میمونہ اشرف نے شرکت کی جبکہ معروف نیورو کنسلٹنٹ ڈاکٹر عمیر رشید چوہدری، ڈاکٹر رانا محمد شفیق، ڈاکٹر شاہد محمود، ڈاکٹر جعفر حسین شاہ، ڈاکٹر عبدالعزیز اور فزیو تھراپسٹ ام البنین بھی استقبالیے میں خصوصی طور پر موجود تھیں۔

تمام شرکا نے پرنسپل پی جی ایم آئی و لاہور جنرل ہسپتال پروفیسر ڈاکٹر سردار محمد الفرید ظفر کی بطور پرنسپل تقرری کا خیر مقدم کیا اور ان کی کامیابی کی دعا کی۔