عیدالاضحی کی تعطیلات کے دوران سرکاری ہسپتالوں میں میڈیکل ایمرجنسی سروسز کو ہائی الرٹ رکھنے کی ہدایت کردی گئی

فیصل آباد (اُردو پوائنٹ اخبارتازہ ترین - اے پی پی۔ 08 اگست2019ء) قائمقام ڈپٹی کمشنرفیصل ۱ٓباد طارق خان نیازی نے ہدایت کی ہے کہ عیدالاضحی کی تعطیلات کے دوران سرکاری ہسپتالوں میں میڈیکل ایمرجنسی سروسز کو ہائی الرٹ رکھاجائے تاکہ کسی بھی ہنگامی صورتحال میں علاج معالجہ کی مستعد سہولیات فراہم ہوسکیں۔انہوں نے یہ ہدایت عیدالاضحی کے انتظامات کے حوالے سے ڈسٹرکٹ ایمرجنسی بورڈ کے اجلاس کی صدارت کرتے ہوئے جاری کی جس میں تمام متعلقہ محکموں کے حکام موجود تھے۔

ڈپٹی کمشنر نے محکمہ صحت سے کہاکہ سرکاری ہسپتالوں میں میڈیکل سٹاف اور وافر ادویات کی دستیابی کو یقینی بنایا جائے اورڈیوٹی روسٹر پر مشتمل جامع پلان فراہم کریں۔انہوں نے عیدالاضحی کے موقع پر مربوط حکمت عملی کے تحت انتظامی وحفاظتی انتظامات کرنے کی تاکید کی اور کہا کہ حفاظتی اقدامات کا ہر زاویہ سے جائزہ لیا جائے اور لوگوں کے جان ومال کے تحفظ کیلئے سکیورٹی آلات کے استعمال کو یقینی بنائیں۔

(جاری ہے)

ڈپٹی کمشنر نے کہا کہ عیدالاضحی انتظامات کی نگرانی کیلئے کنٹرول رومز کو ہمہ وقت فعال رکھا جائے جبکہ متعلقہ اداروں کے سٹاف کی چھٹیاں منسوخ ہونگی۔انہوں نے عیدالاضحی کے اجتماعات کے مقامات اور پبلک پارکس کی معیاری صفائی ستھرائی،بہترین ٹریفک مینجمنٹ وپارکنگ،سیوریج سسٹم کو درست رکھنے کی تاکید کی۔انہوں نے محکمہ سماجی بہبود کی طرف سے عیدکے موقع پر پیشہ ور گداگروں کی یلغار روکنے،سول ڈیفنس کو عیداجتماعات اور تفریح گاہوں میں واک تھروگیٹس لگانے،شعبہ ٹرانسپورٹ کو مسافر گاڑیوں میں اوورچارجنگ اور زائد کرایہ کی وصولی کی روک تھام کیلئے ذمہ داریاں ادا کرنے کی سختی سے ہدایت کی۔

انہوں نے محکمہ لائیوسٹاک کو عارضی مویشی منڈیوں اور شہر کے داخلی راستوں پر قائم چوکیوں پر جانوروں کو چیچڑوں سے بچائو کیلئے سپرے مہم جاری رکھنے کی ہدایت کی اور کہا کہ بیوپاریوں،شہریوں،قصابوں کو کانگو وائرس سے بچائو کیلئے احتیاطی تدابیر پر سختی سے عمل پیرا ہونے کا احساس دلانے کیلئے آگاہی پروگرام جاری رہنا چاہیے۔انہوں نے اسسٹنٹ کمشنرزاور چیف آفیسرز میونسپل کارپوریشن وضلع کونسل سے کہا کہ وہ اپنی تحصیلوں میں عیدالاضحی کے انتظامات کی مکمل نگرانی کریں اور صفائی آپریشن کو کامیاب بنانے میں کوئی کمی باقی نہیں رہنی چاہیے۔

اجلاس کے دوران منیجر آپریشن فیصل آباد ویسٹ مینجمنٹ کمپنی نے عیدالاضحی پر مرتب کئے گئے صفائی پلان سے آگاہ کیا اور بتایا کہ قربانی کے جانوروں کی آلائشوں کو تیز رفتاری کے ساتھ ٹھکانے لگانے کیلئے جامع حکمت عملی وضع کی گئی ہے۔