عوام کو صحت کی معیاری سہولتوں کی فراہمی حکومت کی اولین ترجیح ہے ، وزیر مملکت برائے صحت ڈاکٹر ظفر مرزا

لاہور (اُردو پوائنٹ اخبارتازہ ترین - اے پی پی۔ 05 دسمبر2019ء) عوام کو صحت کی معیاری سہولتوں کی فراہمی حکومت کی اولین ترجیح ہے، وزیر اعظم عمران خان نے اس شعبہ پر خصوصی توجہ مرکوز کر رکھی ہے، طبی تعلیم کے فروغ کے لئے پالیسی بنانے کی ضرورت ہے۔ ان خیا لات کا اظہار وزیر مملکت برائے صحت ڈاکٹر ظفر مرزا نے یونیورسٹی کالج آف میڈیسن اینڈ ڈینٹسٹری، یونیورسٹی آف لاہور میں منعقدہ تیسری عالمی طبی تعلیمی کانفرنس سے خطاب کرتے ہوئے کیا، ملائیشیاء، دمام اور مصر سے تعلق رکھنے والے طبی ماہرین نے بھی کانفرنس میں شرکت کی۔

وزیر مملکت نے کہاہم نے کبھی اس حقیقت پر غور نہیں کیا کہ یہاں کس حد تک نرسز، ڈاکٹرز اور پیرامیڈیکس کی ضرورت ہے، ہمارے طبی سسٹم میں ایک خلاء ہے، یہ پہلی بار ہوا ہے کہ حکومت کی خصوصی دلچسپی کی وجہ سے ملکی سطح پر طبی پالیسی کے حوالے سے بات کی جا رہی ہے، یہ ہمارے طبی اصلاحی ایجنڈا کا ایک اہم پہلوہے۔

(جاری ہے)

انہوں نے کہا پاکستان میں نرسز کی تعداد نسبتاً بیرونی ممالک سے کم ہے وہاں ایک ڈاکٹر کے ساتھ چار نرسیں جبکہ یہاں چار ڈاکٹرز کے ساتھ ایک نرس کام کرتی ہے۔

انہوں نے کہا کہ ہمیں نرسنگ پروفیشن کو اپ گریڈ کرنے کی ضرورت ہے۔ انہوں نے کہا کہ وزیر اعظم عمران خان نے صحت کے شعبہ میں خصوصی توجہ مرکوز کر رکھی ہے جس کی وجہ سے نئی اصلاحات لائی جا رہی ہیں۔ انہوں نے بتایا ہماری یونیورسٹی میں نرسنگ کیلئے 3سال کا کورس نہیں بلکہ بیچیلرز ڈگری پروگرام شروع کیا جا رہا ہے، ہمیں ملک کو صحیح راہ پر لانا ہے۔

انہوں نے کہا دودھ پلانے والی مائوں اور 50 فیصد حاملہ خواتین آئرن کی کمی کا شکار ہیںجبکہ 40فیصد بچوں کا گرو تھ ریٹ کم ہے۔ انہوں نے کہا شعبہ صحت میں عوام کیلئے فوری اصلاحاتی اقدامات کی ضرورت ہے، اس کے لیے تمام طبی اداروں کی مدد درکار ہے۔ انہوں نے کہا ہمیں طبی پروفیشنلز کو عوام کے حالات سے آگاہ کرنا ہے، ہمیں پرائمری سطح پر طبی ضروریات کی رسائی عوام تک پہنچانی ہے، ہر ایک کے لئے برابر طبی سہولیات مہیا کرنی ہیں۔

انہوں نے کہا ہم لیڈی ہیلتھ ورکرز کی استعداد کار میں اضافہ کریں گے، وزیر مملکت نے کہا کہ عوام کی روز مرہ آمدن 2 ڈالرز سے کم ہے، ہم نے ان کے لئے صحت انصاف کارڈ مہیا کیاہے، حکومت نے عوام کی فلاح و بہبود کی ذمہ داری لی ہے، ہم50 لاکھ لوگوں کو آمدن فراہم کر رہے ہیں، آہستہ آہستہ ترقی ہو رہی ہے، ہمارا ٹارگٹ ڈیڑھ کروڑ افراد کو آمدن فراہم کرنا ہے۔ آخر میں وزیر مملکت نے اہم شخصیات میں سووینیئر بھی تقسیم کئے،پروفیسر ڈاکٹر شاہد محمود ملک چیئر پرسن ریکٹر یو نیورسٹی آف لاہور ، پروفیسر ڈاکٹر ریحان احمد خان چیئرپرسن سائینٹفیک کمیٹی بھی کانفرنس میں موجود تھے۔