گرمی کی شدید لہر نے 6 انسانوں کی جان نگل لی،ساہیوال میں 5 اور نواب شاہ میں لو لگنے سے اموات، سورج سوا نیزے پر آ گیا، محکمہ موسمیات نے ملک بھر میں جاری شدید گرمی کی لہر مزید ایک ہفتہ تک جاری رہنے کا الٹی میٹم دیدیا، ایک ہفتہ کے دو ران ملتان میں گیسٹرو کے 1300 مریض ہسپتال داخل ،مسلسل گرم ہواؤں اور تیز دھوپ کی وجہ سے لوگ گھروں تک محدود ، بازاروں میں تربوز اور برفیلے مشروبات کی مانگ میں اضافہ

اسلام آباد/ساہیوال/ رحیم یار خان/ملتان/دادو/جعفر آباد(اُردو پوائنٹ اخبار تازہ ترین۔آئی این پی۔31مئی۔2013ء) ملک بھر میں جاری گرمی کی شدید لہر نے 6 انسانوں کی جان نگل لی، گیسٹرو اور دیگر پیٹ و معدے کے امراض میں مبتلا ہو کر ہزاروں ہسپتالوں میں پہنچ گئے، سورج سوا نیزے پر آ گیا، محکمہ موسمیات نے ملک بھر میں جاری شدید گرمی کی لہر مزید ایک ہفتہ تک جاری رہنے کا الٹی میٹم دیدیا،مسلسل گرم ہواؤں اور تیز دھوپ کی وجہ سے لوگ گھروں تک محدود ہوکر رہ گئے، بازاروں میں تربوز اور برفیلے مشروبات کی مانگ میں اضافہ ہو گیا۔

تفصیلات کے مطابق ملک بھر میں گرمی کی شدید لہر جاری ہے جس کے باعث رحیم یارخان میں درجہ حرارت 45،نواب شاہ اورسکھر 44جبکہ ٹوبہ ٹیک سنگھ میں درجہ حرارت 43ڈگری سینٹی گریڈ ریکارڈکیاگیا۔

(جاری ہے)

فیصل آباد،ڈی جی خان اورسیالکوٹ سمیت بیشتر شہروں میں بھی گرمی کا راج ہے۔ محکمہ موسمیات کے مطابق ملک کے بیشتر علاقوں میں موسم مزید ایک ہفتہ تک گرم اور خشک رہنے کا بھی اِمکان ہے۔

گرمی نے سندھ کے کئی حصوں میں ڈیرہ جما رکھا ہے ، نواب شاہ ، جیکب آباد ،لاڑکانہ ، میں مسلسل گرم ہواؤں اور تیز دھوپ کی وجہ سے لوگ گھروں تک محدود ہوکر رہ گئے ہیں۔ پنجاب میں گرمی کی وجہ سے تربوز کی مانگ بڑھتی جارہی ہے شہریوں نے گرمی بھگانے کیلئے برفیلے مشربات کا سہارا لے لیاہے، دوسری طرف بلوچستان میں چمن، پشین،نصیر آباد ،جعفر آباد اور دوسرے علاقوں میں بھی گرمی کا راج ہے۔

خیبرپختونخواہ میں سوات اور ایبٹ آباد میں سنہری دھوپ ہے محکمہ موسمیات کا کہنا ہے کہ آئندہ چند روز تک کئی شہروں میں گرمی مزید بڑھنے کا امکان ہے۔ دوسری جانب گیسٹرو کی وبا بے قابو ہو گئی ہے اور روزانہ درجنوں مریض ہسپتالوں میں داخل ہو رہے ہیں۔ شہر کے مختلف ہسپتالوں میں اب تک تیرہ سو سے زائد مریض داخل کیے جا چکے ہیں۔ ڈاکٹرز کا کہنا ہے کہ گرمی میں غیر معیاری مشروبات کے استعمال سے گیسٹرو کا مرض تیزی سے پھیل رہا ہے جبکہ مریضوں کے لواحقین کا کہنا ہے کہ ہسپتالوں میں مناسب اقدامات کا فقدان ہے جس سے علاج میں مشکلات کا سامنا ہے ۔

دوسری جانب ساہیوال میں شدید لوڈ شیڈنگ اور لو لگنے سے 5 افراد جاں بحق ہو گئے ۔ ساہیوال کی رہائشی 36 سالہ خاتون جاں بحق ہو گئی۔ بشیر کالونی ساہیوال کا رہائشی60 سالہ رہائشی اقبال ، جہاز گراؤنڈ کا 62 سالہ اعظم ، چک نمبر 56 کا 60 سالہ اللہ دتہ ، تاندلیانوالہ سے مہمان آئی ہوئی 58 سالہ عوامی اور ایک نامعلوم خاتون گرمی اور لو لگنے سے دم توڑ گئے۔ جبکہ نواب شاہ میں بھی شدید گرمی کے باعث حمید چانڈیو نامی ایک شخص لقمہ اجل بن گیا۔…