ایکسپوسنٹرکوروناوائرس ہسپتال لاہور میں آؤٹ ڈورکی سہولت چوبیس گھنٹے جاری

لاہور (اُردو پوائنٹ اخبارتازہ ترین - اے پی پی۔ 29 جون2020ء) وزیرصحت پنجاب ڈاکٹریاسمین راشدکی زیرصدارت محکمہ سپیشلائزڈہیلتھ کئیراینڈمیڈیکل ایجوکیشن میں اہم اجلاس منعقد ہوا،جس میں سیکرٹری صحت بیرسٹرنبیل اعوان، ایڈیشنل سیکرٹری عامرغازی، وائس چانسلرکنگ ایڈورڈمیڈیکل یونیورسٹی پروفیسرڈاکٹرخالدمسعودگوندل، وائس چانسلرفاطمہ جناح میڈیکل یونیورسٹی پروفیسرڈاکٹرعامرزمان خان، سی ای اومئیوہسپتال پروفیسرڈاکٹراسداسلم خان، پرنسپل علامہ اقبال میڈیکل کالج پروفیسرڈاکٹرعارف تجمل،پرنسپل سروسزانسٹی ٹیوٹ آف میڈیکل سائنسزپروفیسرڈاکٹرمحمودایاز،ایم ایس جنرل ہسپتال ڈاکٹرمحمودصلاح الدین، ایم ایس سروسزہسپتال ڈاکٹرافتخار، ایم ایس گنگارام ہسپتال ڈاکٹراحتشام، ایم ایس جناح ہسپتال ڈاکٹریحییٰ سلطان اور ایم ایس مئیوہسپتال ڈاکٹرطاہرخلیل نے شرکت کی۔

(جاری ہے)

صوبائی وزیرصحت ڈاکٹریاسمین راشدنے اجلاس کے دوران سرکاری ہسپتالوں کے آؤٹ ڈورزمیں طبی سہولیات، کوروناوائرس کے مریضوں کے علاج معالجہ کیلئے اقدامات وآئندہ لائحہ عمل کاجائزہ لیا۔ تمام وائس چانسلرز، پرنسپلزاورایم ایس حضرات نے صوبائی وزیرصحت کوکوروناوائرس کے مریضوں کے علاج کی تفصیلات سمیت اہم تجاویزوآراء پیش کیں۔صوبائی وزیر صحت ڈاکٹریاسمین راشد نے کہاکہ ایکسپوسنٹرکوروناوائرس ہسپتال میں آؤٹ ڈورکی سہولت چوبیس گھنٹے جاری ہے۔

تمام سرکاری ہسپتالوں میں کوروناوائرس کے مریضوں کی سہولت کیلئے الگ آؤٹ ڈورزقائم کردئیے گئے ہیں۔ عام مریض بلاخوف سرکاری ہسپتالوں کے آؤٹ ڈورزمیں علاج معالجہ کیلئے جاسکتے ہیں۔ مئیوہسپتال میں کوروناوائرس کے مریضوں کی سہولت کی خاطر ہیپا ٹائٹس کلینک میں آؤٹ ڈورقائم کیاگیاہے۔ ڈاکٹریاسمین راشدنے کہاکہ سرکاری ہسپتالوں میں ای این ٹی، آئی، ڈرماٹالوجی اورڈینٹشٹری کے شعبہ جات میں مریضوں کی سرجری سمیت تمام طبی سہولیات جاری رہیں گی۔

عام مریضوں کے آؤٹ ڈورزکوکوروناوائرس کے مریضوں کے آؤٹ ڈورزسے الگ رکھاگیاہے۔صوبائی وزیر صحت نے مزیدکہاکہ عام مریض علاج معالجہ کی غرض سے بلاجھجک سرکاری ہسپتالوں میں آئیں۔تمام ایم ایس حضرات سرکاری ہسپتالوں میں عام مریضوں کوجراثیم سے پاک رکھنے کیلئے حفاظتی اقدامات اٹھائیں۔