کورونا وائرس کی ممکنہ دوسری لہر روکنے کیلئے عدالتی اقدامات،چیف جسٹس کی ہدایت پر صوبہ بھر کی ضلعی عدالتوں میں فوکل پرسنز نامزد

لاہور(اُردو پوائنٹ اخبارتازہ ترین - این این آئی۔ 16 نومبر2020ء) چیف جسٹس لاہور ہائیکورٹ جسٹس محمد قاسم خان کی جانب سے عدالتوں میں کورونا وائرس کے ممکنہ پھیلاؤ کو روکنے کیلئے متعدد اقدامات کئے جارہے ہیں اور اسی سلسلہ میں ضلعی عدلیہ میں ججز، وکلاء اور سائلین کو کورونا وائرس سے بچانے کیلئے ہدایات نامہ بھی جاری کردیا گیا ۔چیف جسٹس محمد قاسم خان کی جانب سے جاری ہدایات کی روشنی میں صوبہ بھر کی ضلعی عدالتوں میں فوکل پرسنز نامزدکر دیئے گئے ہیں۔

لاہور کی ضلعی عدالتوں کے لئے ایڈیشنل ڈسٹرکٹ اینڈ سیشن جج سیف اللہ سوہل کو کورونا فوکل پرسن نامزد کیا گیا ہے، جبکہ شیخوپورہ میں سینئرسول جج سول ڈویژن محسن علی خان بطور فوکل پرسن بھی ذمہ داریاں ادا کریں گے۔ اسی طرح ننکانہ صاحب میں ایڈیشنل ڈسٹرکٹ اینڈ سیشن جج عاصم منظور، ساہیوال میں سینیئر سول جج شکیل احمد گورایہ، راولپنڈی کی ضلعی عدالتوں میں کوروناکے پھیلائو کو روکنے اور احتیاطی تدابیر کے نفاذ و عملدرآمد کے لئے سینئرسول جج سول ڈویژن کو فوکل پرسن نامزد کیا گیا ہے۔

(جاری ہے)

فیصل آباد کی ضلعی عدالتوں کے لئے سول جج محمد نصر اللہ وٹو، جہلم کیلئے سینیئر سول جج راشد طفیل ریحان، جھنگ کے لئے سینئرسول جج شاہد محمود اور گوجرانوالہ کیلئے سینئرسول جج دلدار شاہ کوفوکل پرسن نامزد کیا گیا ہے۔بہاولنگر کی سول اور سیشن عدالتوں کے لئے سینئرسول جج محمد افضل بھٹی کو کورونا فوکل پرسن نامزد کیا گیا ہے جبکہ راجن پور میں سینئرسول جج خرم شہزاد میرانی کو بطور کورونا فوکل پرسن کی ذمہ داریاں سونپی گئی ہیں۔

ضلعی عدالتوں میں نامزدکردہ فوکل پرسنز لاہور ہائی کورٹ کی جانب سے جاری ہدایت نامہ کے مکمل نفاذ اور عملدرآمد کو یقینی بنائیں گے۔ فوکل پرسن اپنے متعلقہ ضلع کی سیشن وسول عدالتوں میں کورونا وائرس کے پھیلائو کو روکنے کے لئے اٹھائے جانے والے اقدامات کی نگرانی کریں گے۔کسی بھی ضلعی عدالت میںججز یاسٹاف میں کوئی مثبت کیس آنے کی صورت میں فوری طور پر ڈائریکٹوریٹ آف ڈسٹرکٹ جوڈیشری لاہور ہائی کورٹ کو مطلع کیا جائے گا اور رپورٹ ای میل کی جائے گی۔

فوکل پرسنز کی ذمہ داری ہوگی کہ ججز یاسٹاف میں سے کورونا مریضوں کی مکمل دیکھ بھال اور ہر طرح کی طبی سہولیات کو یقینی بنایا جائے۔ کورونا فوکل پرسنز ضلعی انتظامیہ اور ڈسٹرکٹ ہیلتھ اتھارٹیزکے ساتھ مکمل رابطے میں رہیں گے تاکہ عدالتوں میںکورونا کے پھیلائو کوروکا جاسکے۔