ڈینگی وائرس سے متاثرہ جناح ہسپتال وارڈ 5 کے ایسوسی ایٹ پروفیسر ڈاکٹر محمود الحسن انتقال کرگئے

ڈینگی وائرس سے متاثرہ جناح ہسپتال وارڈ 5 کے ایسوسی ایٹ پروفیسر ڈاکٹر محمود الحسن انتقال کرگئے
کراچی (اُردو پوائنٹ اخبارتازہ ترین - این این آئی۔ 07 دسمبر2021ء)کراچی میں ڈینگی وائرس سے متاثرہ جناح اسپتال وارڈ 5 کے ایسوسی ایٹ پروفیسر ڈاکٹر محمود الحسن انتقال کرگئے۔کراچی سمیت سندھ بھر میں رواں سال ڈینگی وائرس سے مرنے والوں کی تعداد 26 ہوگئی ہے۔ محکمہ صحت سندھ کے جاری کردہ اعداد و شمار کے مطابق صوبے بھر میں ڈینگی وائرس سے متاثرہ افراد کی تعداد 6 ہزار 146 سے تجاوز کر چکی ہے۔

جناح اسپتال کے ڈپٹی ڈائریکٹر ڈاکٹر سلمان کے مطابق ڈاکٹر محمودالحسن چند روز قبل بیمار ہوگئے تھے اور ابتدائی ٹیسٹ کے نتیجے میں ان کا ڈینگی ٹیسٹ مثبت آیا تھا جس کے بعد انہیں این ایم سی اسپتال داخل کردیا گیا تھا جہاں طبیعت بگڑنے پر انہیں وینٹی لیٹر لگا دیا گیا تھا تاہم وہ پیر کی رات انتقال کرگئے، وہ ڈینگی شاک سینڈروم کا شکار تھے۔

(جاری ہے)

ڈاکٹر محمود الحسن جناح اسپتال کے میڈیسن وارڈ 5 میں تعینات تھے ، واضح رہے کہ اس وارڈ میں ڈینگی وائرس سے متاثرہ مریض بھی داخل کیے جاتے ہیں۔محکمہ صحت سندھ کے جاری کردہ اعداد و شمار کے مطابق گزشتہ 24 گھنٹوں کے دوران سندھ میں ڈینگی وائرس کے مزید 27 کیسز رپورٹ ہوئے ہیں، صرف دسمبر کے مہینے میں ڈینگی وائرس کا شکار ہونے والے افراد کی تعداد 210 ہو چکی ہے۔ رپورٹ کے مطابق رواں ڈینگی وائرس سے برس کراچی میں 21، حیدرآباد میں چار اور میرپورخاص میں ایک ہلاکت رپورٹ ہوئی ہے ۔

Your Thoughts and Comments