لاہور چیمبر میں وفاقی ٹیکس محتسب کے بارے میں آگاہی سیشن کا انعقاد

لاہور (اُردو پوائنٹ اخبارتازہ ترین - آن لائن۔ 02 مئی2024ء) لاہور چیمبر آف کامرس اینڈ انڈسٹری نے وفاقی ٹیکس محتسب کے تعاون سے وفاقی ٹیکس محتسب کے بارے میں آگاہی سیشن کا انعقاد کیا جس کی صدارت لاہور چیمبر کاشف انور نے کی جبکہ اس موقع پر وفاقی ٹیکس محتسب کے انکم ٹیکس ایڈوائزرز خالد جاوید، احمد شہاب اور ڈائریکٹر ایف ٹی او ناظم رضا نے بھی خطاب کیا۔

لاہور چیمبر آف کامرس اینڈ انڈسٹری کے صدر کاشف انور نے شرکاء کو خوش آمدید کہا اور تاجر برادری کے ٹیکس سے متعلق تمام تنازعات کے فوری حل کے لیے ہر ممکن اقدامات کرنے پر وفاقی ٹیکس محتسب کا شکریہ ادا کیا۔کاشف انور نے کہا یہ خوش آئند ہے کہ وفاقی ٹیکس محتسب نے ملک کے تمام بڑے چیمبرز میں تاجر برادری کی رہنمائی کے لیے اس طرح کے سیشنز کا انعقاد کیا اور آگاہی پیدا کرنے کے لیے مختلف ٹیکس بارز اور ایس ایم ایز کے ساتھ میٹنگز بھی کی ہیں۔

(جاری ہے)

انہوں نے کہا کہ یہ انتہائی اہم اقدام ہیں کیونکہ لوگوں کی بڑی تعداد ابھی تک وفاقی ٹیکس محتسب کے کام اور اس کے فوائد سے پوری طرح آگاہ نہیں ہے جس کی وجہ سے انہیں ٹیکس سے متعلق مسائل کو حل کرنے میں بہت سی مشکلات کا سامنا ہے۔لاہور چیمبر کے صدر نے کہا کہ وفاقی ٹیکس محتسب ڈاکٹر آصف محمود جاہ کی ذاتی دلچسپی نے ایف ٹی او اور لاہور چیمبر آف کامرس اینڈ انڈسٹری کے درمیان بہت مضبوط ورکنگ ریلیشن شپ قائم کیے ہیں۔

انہوں نے کہا کہ ایف ٹی او ٹیکس سے متعلق تمام تنازعات کے فوری حل کے لیے ہر ممکن اقدامات کر رہا ہے۔کاشف انور نے مزید کہا کہ لاہور چیمبر آف کامرس اینڈ انڈسٹری ٹیکس ریفنڈز اور دیگر متعلقہ مسائل کے حل کے لیے وفاقی ٹیکس محتسب کے فعال کردار کو انتہائی قدر کی نگاہ سے دیکھتا ہے۔ انہوں نے کہا کہ چند ماہ قبل لاہور چیمبر آف کامرس اینڈ انڈسٹری میں ایف ٹی او آفس کی جانب سے ٹیکس ریفنڈز کے چیک کی ادائیگی کے حوالے سے ایک تقریب کا انعقاد بھی کیا گیا تھا۔

انہوں نے امید ظاہر کی کہ ٹیکس ریفنڈز کی ادائیگی کے عمل کو مستقبل قریب میں مزید فعال بنایا جائے گا تاکہ برآمدی شعبے کے لیے زیادہ سے زیادہ سہولتیں فراہم کی جاسکیں۔لاہور چیمبر کے صدر نے مزید کہا کہ ملک کو اس معاشی بحران سے نکالنا وقت کی اہم ضرورت ہے اور تاجر برادری اس سلسلے میں کلیدی کردار ادا کر سکتی ہے بشرطیکہ حکومت کی جانب سے انہیں مکمل سہولت فراہم کی جائے۔ اس مقصد کے حصول کے لیے ملکی اداروں کو فعال کردار ادا کرنا ہو گا اور تاجر برادری کے ساتھ مکمل تعاون کرنا ہو گا۔