ڈیرہ غازیخان کے صوبائی حلقہ پی پی 290 میں ضمنی انتخابات کے لئے پولنگ کا آغاز ہو گیا

ڈیرہ غازی خان (اُردو پوائنٹ اخبارتازہ ترین - اے پی پی۔ 21 اپریل2024ء) ڈیرہ غازیخان کے صوبائی حلقہ پی پی 290 میں ضمنی انتخابات کے لئے پولنگ کا آغاز 8بجے ہو گیا جو بغیر کسی وقفہ کے شام 5بجے تک جاری رہے گی۔تفصیلات کے مطابق 19لاکھ 39ہزار 560 ووٹرز اپنا حقِ رائے دہی استعمال کر رہے ہیں جن میں سے 88506 خواتین اور 105454 مرد ووٹرز شامل ہیں۔ضمنی انتخابات میں مختلف سیاسی جماعتوں و آزاد حیثیت سے 7امیدوار حصہ لے رہے ہیں۔

جن مسلم لیگ ن کے امیدوار سردار علی یوسف لغاری اور پاکستان تحریک انصاف کے حمایت یافتہ امیدوار سردار محی الدین کھوسہ کے درمیان کانٹے مقابلہ ہو رہا ہے۔حلقے میں 117 پولنگ سٹیشن بنائے گئے ہیں جن میں 15 انتہائی حساس اور 54 کو حساس قرار دیا گیا ہے۔حساس اور انتہائی حساس پولنگ سٹیشن کی سرگرمیوں کو مانیٹر اور ویڈیو ریکارڈ مرتب کرنے کےلئے جدید کیمرے نصب کئے گئے ہیں۔

(جاری ہے)

حلقہ میں امن و امان کی فضا برقرار رکھنے کے لیے 1900سے زائد پولیس اہلکار تعینات کیے گئے ہیں اس کے علاوہ پولیس اور دیگر قانون نافذ کرنے والے اداروں کی گاڑیاں گشت بھی کر رہی ہیں۔واضح رہے کہ رواں برس عام انتخابات کے دوران حلقہ این اے 186 اور پی پی 290سے وفاقی وزیر سردار اویس احمد خان لغاری کامیاب ہوئے تھے اور ان کی جانب سے پی پی 290 کی نشت خالی کرنے پر اس حلقے میں ضمنی انتخابات منعقد ہو رہے ہیں۔