گجرات ،ْ ایف آئی اے کی کارروائی،

ہنڈی حوالہ کی رقم منتقل کرنیکی کوشش ناکام ،ْ چار ملزمان گرفتار

ہفتہ 1 دسمبر 2018 14:53

گجرات (اُردو پوائنٹ اخبارتازہ ترین - این این آئی۔ 01 دسمبر2018ء) ایف آئی اے گجرات نے بڑی کارروائی کرتے ہوئے ہنڈی حوالہ کی رقم منتقل کرنے کی کوشش ناکام بنا دی، 4 ملزمان کو گرفتار کر کے 5 کروڑ 50 لاکھ برآمد کر لئے۔

(جاری ہے)

ایف آئی اے گجرات نے خفیہ اطلاع پر ملتان کے قریب گاڑی سے حوالے ہنڈی کی رقم برآمد کر کے ملزمان کو گرفتار کر لیا ،ْ ایف آئی اے کے مطابق گاڑی پر رقم کراچی منتقلی کی اطلاع موصول ہوتے ہی ڈائریکٹر ایف آئی اے پنجاب محمد وقار عباسی نے فوری طور پر کارروائی کا حکم دیا جس پر ایف آئی اے ٹیم نے گاڑی کا تعاقب کرنا شروع کیا اور ملتان کے قریب پہنچ کر گاڑی کو روک کر تلاشی لی گئی جس پر گاڑی سے 5 کروڑ 50 لاکھ برآمد کر کے گاڑی کے ڈرائیور سمیت 4 افراد کو گرفتار کر لیا ہے۔

اس موقع پر ایف آئی اے ملتان کی ٹیم بھی ہمراہ تھی۔ملزمان کو تھانہ ایف آئی اے ملتان منتقل کیا گیا جنہیں ضروری کارروائی کے بعد ایف آئی اے گجرات کے حوالے کیا جائیگا۔ ایف آئی کے مطابق ملزمان عرصہ دراز سے حوالہ ہنڈی کا غیر قانونی کاروبار کر رہے تھے، جن سے تفتیش جاری ہے، ملزمان کے مزید ساتھیوں کو بھی جلد گرفتار کر لیا جائے گا۔