حکومت نے دوبارہ حج کرنے اور عمر کی بالائی حد کی پابندی ختم کردی

اسلام آباد ( اُردو پوائنٹ اخبارتازہ ترین۔ 04 اگست 2025ء ) حکومت نے دوبارہ حج کرنے اور عمر کی بالائی حد کی پابندی ختم کردی۔ تفصیلات کے مطابق وزارت مذہبی امور کا کہنا ہے کہ شہریوں کے دوبارہ حج کرنے اور اس حوالے سے عمر کی بالائی حد کی پابندی ختم کر دی گئی ہے، رجسٹرڈ عازمین حج سے واجبات کی وصولی کا آغاز آج سے ہوچکا ہے، رجسٹریشن کروانے افراد سے پہلی قسط 9 اگست تک وصول کی جائے گی، 11 سے 16 اگست تک نئے عازمین حج بھی اپلائی کرسکیں گے، دوسری قسط یکم نومبر سے وصول کی جائے گی۔

بتایا گیا ہے کہ حج پیکیج 2026ء ساڑھے 11 سے ساڑھے 12 لاکھ روپے کے درمیان ہوگا، آئندہ برس حج کے خواہشمند افراد نامزد بینکوں اور آن لائن پورٹل کے ذریعے حج درخواستیں جمع کرواسکتے ہیں، پہلے آئیے پہلے پائیے کی بنیاد پر رجسٹرڈ افراد سے پہلی قسط آج سے 9 اگست تک وصول کی جائے گی، نشستیں دستیاب ہونے پر 11 سے 16 اگست تک نئے عازمین حج بھی اپلائی کرسکیں گے، نشستیں مکمل ہوتے ہی حج واجبات کی وصولی روک دی جائے گی۔

(جاری ہے)

معلوم ہوا ہے کہ رجسٹرڈ عازمین سے سوا لاکھ کا حج کوٹہ اس بار بھی مکمل نہ ہونے کا خدشہ ہے اس لیے وزارت مذہبی امورنے کم درخواستوں کے خدشے پر غیر رجسٹرڈ عازمین کو بھی موقع دینے کا فیصلہ کیا ہے، غیر رجسٹرڈ عازمین سے درخواستوں کی وصولی 11 سے 16 اگست تک جاری رہے گی، درخواستیں پہلے آئیے پہلے پائیے کی بنیاد پر وصول کی جائیں گی، حج درخواستوں کے لیے پہلا موقع رجسٹرڈ عازمین کو دیا جائے گا، 38 سے 42 روزہ حج کے لیے 5 لاکھ روپے جمع کرانا ہوں گے جب کہ 20 سے 25 روزہ مختصر حج کی پہلی قسط کے طور پر ساڑھے 5 لاکھ روپے جمع کرانا ہوں گے۔

دوسری طرف نجی سکیم کے تحت رواں سال حج سے محروم رہ جانے والے ہزاروں عازمین کیلئے ایک اہم پیشرفت ہوئی ہے، وفاقی وزیر مذہبی امور نے بھی اس پیشرفت کی باقاعدہ تصدیق کی ہے، جس کے تحت یہ عازمین آئندہ برس بغیر کسی اضافی رقم کے حج ادا کر سکیں گے، نجی حج آپریٹرز کی نمائندہ تنظیم حج آرگنائزیشن ایسوسی ایشن پاکستان (ہوپ) نے وزارت مذہبی امور کو یقین دہانی کرائی ہے کہ رواں سال حج سے رہ جانے والے 25 سے 26 ہزار عازمین کو آئندہ سال حج پر بھیجا جائے گا اور ان سے دوبارہ کوئی اضافی رقم وصول نہیں کی جائے گی کیوں کہ مذکورہ عازمین کی طرف سے جمع کروائی گئی رقم اب بھی سعودی عرب میں محفوظ ہے، سعودی عرب کے بینکنگ سسٹم میں ”والٹ“ اکاؤنٹس کے تحت ان عازمین کے تقریباً 490 ملین سعودی ریال (تقریباً 36 ارب پاکستانی روپے) موجود ہیں۔