وفاقی پولیس کی مختلف کارروائیاں، 23ملزمان گرفتار

اسلام آباد ۔ (اُردو پوائنٹ اخبارتازہ ترین - اے پی پی۔ 07 دسمبر2019ء) وفاقی پولیس نے ضلع بھر میں منشیات و شراب فروشوں سمیت دیگر جرائم پیشہ عناصر کے خلاف مہم کے تحت مختلف کارروائیوں کے دوران 23ملزمان کو گرفتار کر کے بھاری مقدار میں منشیات و شراب اور اسلحہ وایمونیشن برآمد کر لیا ہے۔ پولیس ترجمان کے مطابق تھانہ آبپارہ پولیس نے دوران چیکنگ کارروائی کرتے ہوئے دو شراب فروشوں راشد مسیح اور شاہد مسیح کو گرفتار کر کے 70لیٹر شراب برآمد کر لی ،تھانہ سیکرٹریٹ پولیس نے منشیات فروش ملزم محمد آصف سے 132گرام چرس جبکہ کوہسار پولیس نے ملزم ثاقب اقبال سے ایک بوتل شراب برآمد کر لی ۔

تھانہ بھارہ کہو پولیس نے دوران سپیشل چیکنگ تین ملزمان نوید یامین،محمد عقیل اور شاہد محمود کو گرفتار کر کے دو پسٹلز معہ ایمونیشن اور دو بوتلیں شراب برآمد کر لی۔

(جاری ہے)

تھانہ بنی گالہ پولیس نے تین شراب فروشوں نذیر مسیح ،محمد اخلاق اور نوید کو گرفتار کر کے 36بوتلیں شراب برآمد کر لیں۔ تھانہ کراچی کمپنی پولیس نے مختلف کارروائیوں میں تین شراب فروشوں ریحان مسیح ،سلامت مسیح اور سرفراز اشرف کو گرفتار کر کے 130لیٹر شراب برآمد کر لی۔

تھانہ ترنول پولیس نے تین ملزمان زاہد خان،محمد سلیم اور نواب خان سے دو پسٹلز معہ ایمونشین اور پانچ کپی شراب برآمد کر لی۔ تھانہ رمنا پولیس نے ملزم محسن سلیم سے چوری شدہ موٹر سائیکل برآمد کر لیا۔ تھانہ نون پولیس نے دو ملزمان جہان زیب اور نعمت مسیح کو گرفتار کر کے ایک پسٹل معہ ایمونیشن اور 180بوتلیں شراب برآمدکرلی۔ تھانہ شمس کالونی پولیس نے ایک عورت سمیت دومنشیات فروشوں محمد ندیم اورعائشہ کو گرفتار کر کے 2463گرام چرس برآمد کر لی ۔

ملزمان یہ چرس پشاور سے سمگل کر کے اسلام آباد اور پنجاب کے مختلف علاقوں میں سپلائی کرتے تھے،تھانہ سہالہ اور لوہی بھیر پولیس نے دو ملزمان برکت علی اور نعیم طارق سے ایک پسٹل معہ ایمونیشن اور 230گرام چرس برآمد کر لی۔ تمام گرفتار ملزمان کے خلاف الگ الگ مقدمات درج کر کے مزید تفتیش شروع کر دی گئی ہے ،ڈی آئی جی آپریشنز وقارالدین سید نے تمام کارکردگی کو سراہا ہے ،انہوں نے کہا کہ اس مہم کو ضلع بھر بڑے پیمانے پر جاری رکھا جائے جب تک شہر سے منشیات فروشی جیسے مکروہ دھندے کا خاتمہ نہیں ہو جاتا ،انہوں نے شہریوں سے بھی اپیل کی ہے کہ وہ اپنے اردگرد کسی بھی مشکوک شخص یا مکروہ دھندے میں ملوث عناصر کے متعلق پولیس کو اطلاع کریں تاکہ ایسے عناصر کے خلاف تادیبی کارروائیاں عمل میں لائی جا سکیں ۔