تازہ شواہد نے بھارت کو مزید بے نقاب اور پاکستان کے موقف کی تائید کردی ،ترجمان دفترخارجہ

اسلام آباد(اُردو پوائنٹ اخبارتازہ ترین - این این آئی۔ 17 جنوری2021ء) ترجمان دفتر خارجہ نے کہا ہے کہ حالیہ مہینوں میں عالمی برادری کے سامنے بھارت کی ریاستی سرپرستی میں پاکستان کے خلاف دہشت گردی میں ملوث ہونے اور پاکستان مخالف جھوٹی عالمگیر مہم چلانے کے ناقابل تردید شواہد آچکے ہیں۔ ٹی۔ آر۔ پی کیس میں ممبئی پولیس کی چارج شیٹ میں بھارتی ری پبلک ٹی وی کے اینکر کے ٹرانسکرپٹس شامل ہیں جس نے بھارت کے مکروہ اور مذموم عزائم مزید بے نقاب کردئیے اور پاکستان کے دیرینہ موقف کی تائید وتصدیق کردی ہے۔

انہوں نے کہا کہ تازہ انکشافات سے ثابت ہوگیا کہ پاکستان اب تک جن امور کی مسلسل نشاندہی کرتا آ رہا ہے، وہ تمام حقائق درست ہیں۔ بی۔جے۔پی حکومت نے فالس فلیگ آپریشن رچایا، پاکستان پر دہشت گردی سے متعلق جھوٹ باندھا، بھارت کے اندر قوم پرستی کی آگ کو مزید بھڑکایا، نام نہاد سرجیکل سٹرائیک کے دعوے کرنے کے علاوہ انتخاب جیتنے کی خاطر اپنی قوم کے جذبات کو گمراہ کن رخ پرڈالا ۔

(جاری ہے)

یہ طرز عمل بلاشبہ آر۔ایس۔ایس، بی۔جے۔پی حکومت کے انتخابی اندازوں کے مطابق دوہرایاگیا۔ ترجمان دفتر خارجہ نے کہا کہ ہم نے ابتداسے ہی پاکستان کے خلاف بھارتی گمراہ کن بے بنیاد اور زہریلے بھارتی پراپگنڈے کو مسترد کیا اور یہ حقائق اجاگر کئے کہ فروری دوہزار انیس میں پلوامہ حملے کا سب سے بڑا فائدہ بی۔جے۔پی حکومت کو ہوا ہے کیونکہ اس نے لوک سبھا میں واضح نشستیں جیت لیں۔

ترجمان نے کہا کہ یہ ٹرانسکرپٹ اس امر کا مزید بین ثبوت ہے کہ کیسے فالس فلیگ آپریشن کے ذریعے واضح انتخابی کامیابی کی راہ ہموار کی گئی اور اس منصوبے پر عمل کیاگیا۔ یہ ٹرانسکرپٹ ہندتوا انتہاپسند حکومت اور بھارتی میڈیا میں ان کے کارندوں کے گٹھ جوڑ کو بے نقاب کرتے ہیں۔ ایک طرف اس سے یہ پتہ چلتا ہے کہ آر۔ایس۔ایس، بی۔جے۔پی کا انتہاپسند ایجنڈا کس قدر گہرائی میں جاکر بھارتی ریاستی اداروں میں سرایت کرچکا ہے تو دوسری جانب اس سے یہ بھی واضح ہوجاتا ہے کہ بھارتی شہریوں کے حقوق، آزادی اور بھارتی معاشرے میں جمہوری اقدار کو بیمار ذہنیت کے ذریعے کس بری طرح تباہ کیا اور چھینا جارہا ہے۔

ترجمان دفتر خارجہ نے کہا کہ یہ امر نہایت اہم ہے کہ کس طرح سفاک حکومت کے فروعی سیاسی مفادات کے لئے کئے جانے والے اقدامات خطے میں امن وسلامتی کو سنگین خطرات سے دوچار کررہے ہیں۔ انہوں نے کہا کہ پاکستان بھارتی اشتعال انگزیوں کے باوجود سچائی اور حقائق کی روشنی میں بھارتی جھوٹ اورشرانگزیاں بے نقاب کرنے کی اپنی کوششیں ذمہ داری کے ساتھ جاری رکھے گا۔ ہم امید کرتے ہیں کہ عالمی برادری صورتحال کا حقیقی معنوں میں ادراک کرتے ہوئے علاقائی ماحول خراب کرنے اور جنوبی ایشیاکے امن وسلامتی کو خطرے میں ڈالنے پر بھارت کو کٹہرے میں کھڑا کرے گی۔