پرویز مشرف قاتل ہیں ،ْاگر دلیر ہیں تو عدالتوں کا سامنا کریں ،ْ رضا ربانی

محترمہ نے مختلف خطوط میں مشرف کے بارے میں لکھا ،ْ لندن اور دبئی میں بیٹھ کر عیاشیاں کررہے ہیں ،ْ چیئر مین سینٹ آئین کے مطابق پارلیمنٹ کوسب سے زیادہ مضبوط ادارہ ہونا چاہیے ،ْانتخابی اصلاحات ترمیمی بل منظور ہونے سے متعلق سوال پر جواب دینے سے گریز

ہفتہ 23 ستمبر 2017 16:21

جامشورو(اُردو پوائنٹ اخبارتازہ ترین - این این آئی۔ 23 ستمبر2017ء) چیئرمین سینیٹ رضا ربانی نے کہا ہے کہ پرویز مشرف قاتل ہیں اگر وہ دلیر ہیں تو عدالتوں کا سامنا کریں۔گزشتہ روز سابق صدر پرویز مشرف نے اپنے ویڈیو بیان میں سابق صدر آصف علی زرداری پر الزام عائد کرتے ہوئے کہا تھا کہ بے نظیر بھٹو اور مرتضیٰ بھٹو کے قتل کے ذمہ دار آصف زرداری ہیںجبکہ پرویز مشرف کے بیان پر آصف زرداری نے انہیں شدید تنقید کا نشانہ بناتے ہوئے کہا تھا کہ اگر وہ بہادر ہیں تو پاکستان آکر عدالتوں کا سامنا کریں۔

جامشورو میں میڈیا سے گفتگو کرتے ہوئے چیئر مین سینٹ میاں رضا ربانی نے سابق صدر پرویز مشرف کے بے نظیر بھٹو کے قتل سے متعلق بیان پر رد عمل میں کہا کہ محترمہ نے مختلف خطوط میں مشرف کے بارے میں لکھا لہٰذا پرویز مشرف قاتل ہیں اور ان کے بارے میں کیا کہوں، وہ لندن اور دبئی میں بیٹھ کر عیاشیاں کررہے ہیں، مشرف اگر دلیر ہیں تو عدالتوں کا سامنا کریں۔

(جاری ہے)

سینیٹ میں انتخابی اصلاحات ترمیمی بل منظور ہونے سے متعلق سوال پر رضا ربانی نے کہا کہ یہ سیاسی سوال ہے چیئرمین سینیٹ کی حیثیت سے جواب نہیں دے سکتا۔چیرمین سینیٹ نے کہا کہ کسی بھی الیکشن کے بعد سیاسی صورتحال بہتر ہوتی ہے، آئین کی حکمرانی نہ ہو اور ادارے کمزور ہوں تو ایسی باتیں ہوتی ہیں، پارلیمان سب سے کمزور ترین ادارہ ہے، آئین کے مطابق پارلیمنٹ کوسب سے زیادہ مضبوط ادارہ ہونا چاہیے۔