پی آئی ای کے سابق غیر ملکی سی سی او کیخلاف مقدمہ درج

ْ دونوں غیر ملکیوں کی گرفتاری کے لیے کوششیں شروع کردی گئی ہیں، ڈاپٹی ڈائریکٹرایف آئی اے

پیر 30 نومبر 2020 14:26

پی آئی ای کے سابق غیر ملکی سی سی او کیخلاف مقدمہ درج

کراچی(اُردو پوائنٹ اخبارتازہ ترین - این این آئی۔ 30 نومبر2020ء) قومی ایئرلائن کو مالی نقصان پہنچانے پر وفاقی تحقیقاتی ادارے ایف آئی اے میں دو غیر ملکیوں کیخلاف مقدمہ درج کرلیا گیاہے۔مقدمے میں سابق قائم مقام جرمن سی ای او برنڈ ہلڈربرانڈ اور عارضی کنسلٹنٹ آسٹریلین نژاد ہیلموٹ بیچونفر کو نامزد کیا گیا ہے۔اس ضمن میں ڈپٹی ڈائریکٹر عبدالروف شیخ نے بتایاکہ غیر قانونی تقرری سے قومی خزانے کو 50 لاکھ سے زائدکا نقصان پہنچایا گیا۔

ایف آئی اے کے مطابق دونوں غیر ملکیوں کیخلاف مقدمہ کارپوریٹ کرائم سرکل میں درج کیا گیا ہے۔ایف آئی آر کے مطابق 4 سال قبل پی آئی اے انجینئرنگ ڈائریکٹر نے ایک اسامی کیلئے ریکوزیشن کی، سابق قائم مقام جرمن سی ای او نے مروجہ قوانین کے برخلاف تقرری کرلی۔

(جاری ہے)

ایف آئی آر میں کہا گیا ہے کہ آسٹریلین نژاد ہیلموٹ بیچونفرکی بطور کنسلٹنٹ تقرری بھی خلاف قانون کی گئی،تین ماہ کیلئے آسٹریلین کنسلٹنٹ کو 15 ہزار ڈالر اور دیگر پرتعیش مراعات پر رکھا گیا۔

ایف آئی آر کے مطابق یہ اقدام کنٹریکٹ رولزریگولیشن کے منافی اور مجاز اتھارٹی کی اجازت کے بغیر کیا گیا جس سے قومی خزانے کو 50لاکھ روپے سے زیادہ کا نقصان پہنچا۔ڈپٹی ڈائریکٹرایف آئی اے کے مطابق دونوں غیر ملکیوں کی گرفتاری کے لیے کوششیں شروع کردی ہیں۔