پاک بحریہ کے فضائی فلیٹ میں جدید میرینائزڈ ایئر کرافٹ اور سی کنگ ہیلی کاپٹرز کی شمولیت

کراچی۔ (اُردو پوائنٹ اخبارتازہ ترین - اے پی پی۔ 12 دسمبر2018ء) پاک بحریہ نے اپنی آپریشنل صلاحیتوں کو بڑھانے اور اُن کو مزید مؤثر بنانے کے لئے پہلے جدید میر ینائزڈ ایئر کرافٹ اور سی کنگ ہیلی کاپٹرزکو اپنے فلیٹ میں شامل کر لیا۔ بدھ کو جاری کردہ اعلامیہ کے مطابق اس سلسلے میں پی این ایس مہران کراچی میں ایک تقریب کا انعقاد کیا گیا جس کے مہمان خصوصی پاک بحریہ کے سربراہ ایڈ مرل ظفر محمود عباسی تھے۔

پہلا میرینائزڈ اے ٹی آر ایئر کرافٹ ایک جدید اور بہت زیادہ استعمال ہونے والا ٹربو پراپ (Turboprop) ایئر کرافٹ ہے جو جدید ہتھیاروں اور سنسرز سے لیس ہے۔ یہ ایئر کرافٹ پاکستان نیوی کے فضائی جنگی بیڑے کی آپریشنل صلاحیتوں میں مزید اضافے کا باعث ہوگا اور جدید دور کی بحری جنگ کی ضروریات کو بھی پورا کرے گا۔

(جاری ہے)

برطانیہ سے حاصل کئے جانے والے دو ایم کے 3 ای/ ایم کے 4 سی کنگ ہیلی کاپٹر ز کی پاک بحریہ کے فضائی بیڑے میں شمولیت سے پاک بحریہ کے آپریشنل بالخصوص ٹروپس کی منتقلی کی صلاحیتوں میں اضافہ ہوگا۔

ان میں سے ایک ہیلی کاپٹر کو سمندر میں سرچ اینڈ ریسکیوآپریشن کے لیے خاص طور پر تیار کیا گیا ہے جبکہ دوسرا ٹروپس کی ایک جگہ سے دوسری جگہ منتقلی کی خصوصیت کا حامل ہے۔عملے کی تربیت کے اعلی معیار کو یقینی بنانے کے لیے آج پاک بحریہ نے اینٹی سب میرین وار فیئر ہیلی کاپٹر Z9ECکے جدید ٹریننگ سیمو لیٹرکو بھی پاکستان نیوی کا حصہ بنایا تاکہ اس ہیلی کاپٹر کے عملے کو تربیت دی جاسکے۔

یہ سیمو لیٹر ہیلی کاپٹر کے عملے کو زندگی اور قیمتی اثاثہ جات کوخطرہ میں ڈالے بغیر اینٹی سب میرین وار فئیر اور ایمر جنسی حالات سے نمٹنے کی تربیت، کم خرچ پر مہیا کر ے گا۔ اس موقع پر خطاب کرتے ہوئے پاک بحریہ کے سربراہ ایڈمرل ظفر محمود عباسی نے کہا کہ موجود ہ وقت میں روایتی کردار کے علاوہ پاک بحریہ بحری دہشت گردی جیسے اُبھر تے ہوئے چیلنجز سے نمٹنے ، خطے میں بحری قزاقی کی بیخ کنی کے ساتھ ساتھ میری ٹائم سیکورٹی آپریشنز کی انجام دہی میں بھی مصروفِ عمل ہے۔

نیول چیف نے ہائبرڈ وار فیئر اور سائبر کرائم کے خطرات سے آگاہ رہنے کی ضرورت پر بھی زور دیا۔ انہوں نے کہا کہ پاک بحریہ ان چیلنجز سے بخوبی آگاہ ہے اور ان نئے پلیٹ فارمز کی پاک بحریہ میں شمولیت سے ان چیلنجز سے نمٹنے ، قومی مقاصد کے حصول ،بین الاقوامی ذمہ داریوں کو پورا کرنے اور اپنے بحری مفاد ات کے تحفظ کی صلاحیتوں میں مزید اضافہ ہوگا۔

نیول چیف نے مزید کہا کہ جنگیں صرف مادی وسائل کے بل بوتے پر نہیں لڑی جاتی ہیں بلکہ جذبہ ایمانی بھی اس سلسلے میں بھرپور اہمیت کا حامل ہے۔ ماضی میں بھی پاک بحریہ اپنے جذبے اور صلاحیتوں کی مدد سے تعداد میں اپنے سے کئی گنا بڑے دشمن کو ناقابلِ تلافی نقصان پہنچا چکی ہے۔ ایڈمرل ظفر محمود عباسی نے کہا کہ ٹریننگ سیمولیٹر کی پاک بحریہ میں شمولیت سے ہمیں اپنے عملے کی بہترین تر بیت اور پیشہ ورانہ صلاحیتوںکے حصول میں بھر پور مدد ملے گی۔ تقریب میں پاک بحریہ کے فلیگ آفیسرز ، افسران اور سول شخصیات نے شرکت کی۔