گندم کی در آمد سے ملکی زرمبادلہ کو نقصان ہوگا،محمود مولوی

ملک میں گندم کا کو ئی بحران نہیں کیونکہ ملک میں وافر مقدار میں گند م موجود ہے۔ مارچ میں گند م کی فصل کی کٹائی سے ہم گندم بر آمد کرنے کے اہل ہونگے، وفاقی مشیر برائے وزارت بحری امور

منگل 21 جنوری 2020 23:37

کراچی(اُردو پوائنٹ اخبارتازہ ترین - آن لائن۔ 21 جنوری2020ء) وفاقی مشیر برائے وزارتِ بحری امور محمود مولوی نے کہا ہے کہ گندم کی در آمد سے ملکی زرمبادلہ کو نقصان ہوگا۔ ملک میں گندم کا کو ئی بحران نہیں کیونکہ ملک میں وافر مقدار میں گند م موجود ہے۔ مارچ میں گند م کی فصل کی کٹائی سے ہم گندم بر آمد کرنے کے اہل ہونگے۔

(جاری ہے)

تاجروں کے وفد سے ملاقات کے دوران محمود مولوی نے کہا کہ فی الوقت گندم کی در آمدمسئلے کا حل نہیں، اصل مسئلہ بد انتظامی ہے۔

آٹے کا مصنوعی بحران ایک سوچی سمجھی منصوبہ بندی کے تحت لایا گیا جو حکومت کے خلاف سازش ہے۔ سندھ میں پیپلز پارٹی کی حکومت کی غفلت کے باعث صوبے میں گندم کا بحران پیدا ہوا تاہم پنجاب میں یہ بحران سمجھ سے باہر ہے۔ محمود مولوی نے کہا کہ آٹے کی بڑھتی ہوئی قیمتوں کے ذمہ داران کو بے نقاب ہوناچاہئے۔ حکومتی رِٹ کے نفاذ کیلئے 70 روپے پر آٹا بیچنے والوں کے خلاف کریک ڈاؤن ضروری ہے۔#