شمالی وزیرستان میں دیور نے بھابی کو غیرت کے نام پر قتل کردیا

منگل 2 فروری 2021 15:53

شمالی وزیرستان (اُردو پوائنٹ اخبارتازہ ترین - این این آئی۔ 02 فروری2021ء) شمالی وزیرستان میں میرانشاہ سے دور ایک گاؤں میں دیور نے غیرت کے نام پر گھر کے باہر موجود ایک شخص اور اپنی بھابھی کو قتل کردیا۔ایس پی انویسٹی گیشن شمالی وزیرستان کے مطابق میرانشاہ سے شمال کی طرف 25 کلومیٹر دور پاک افغان سرحد کے قریب تحصیل غلام خان کے گاوں لولی فقیران میں غیرت کے نام پر ایک خاتون اور ایک شخص کو قتل کردیا گیا۔

(جاری ہے)

پولیس کے مطابق دیور نے گھر کے باہر موجود شخص کو خنجر سے وار کرکے قتل کیا اور بعد ازاں گھر میں داخل ہوکر اپنی بھابھی کو بھی غیرت کے نام پر قتل کردیا، خاتون کی عمر تقریبا 30 سال تھی جو 2 بچیوں کی ماں اور 8 ماہ حاملہ تھی۔دوسری جانب پولیس کو اطلاع ملتے ہی آئی جی خیبرپختونخوا ڈاکٹر ثناء اللہ عباسی کے حکم پر ڈی پی او شفیع اللہ گنڈاپور نے خصوصی ٹیم تشکیل دی جس نے بھاری نفری کے ساتھ جائے وقوعہ پر چھاپہ مار کر ملزم کو گرفتار کر لیا۔پولیس نے ملزم کو آلہ قتل سمیت گرفتار کرلیا اور دونوں لاشوں کو ڈی ایچ کیو ہسپتال میرانشاہ پوسٹ مارٹم کیلئے منتقل کردیا ، ملزم نے اعتراف جرم کرلیا ہے جس کو قانون کے مطابق سزا دی جائے گی۔