مصباح 45 سال کی عمر میں بھی فٹ،کرکٹرز کے ساتھ فٹنس ٹیسٹ دینے کو تیار

لاہور (اردو پوائنٹ تازہ ترین اخبار۔2اپریل 2020ء )  پاکستانی کرکٹ ٹیم کے ہیڈ کوچ و چیف سلیکٹر مصباح الحق آئندہ ماہ کی28 تاریخ کو 46 سال کے ہوجائیں گے ۔2017ء میں انٹر نیشنل اور 2018ء میں ڈومیسٹک کرکٹ سے ریٹائر ہونے اور ورلڈ کپ 2019ء کے بعد قومی ٹیم کی کوچنگ کی ذمے داریاں سنبھالنے کے باوجود وہ سپر فٹ ہیں۔ سابق کپتان کہتے ہیں کہ میں اب بھی روزانہ ڈیڑھ سے پونے دو گھنٹے ٹریننگ کرتا ہوں اور اگر موقع ملا تو کھلاڑیوں کے ساتھ فٹنس ٹیسٹ دینے کو تیار ہوں۔

(جاری ہے)

خوش قسمت ہوں کہ میرے گھر جدید جمنازیم اور نیٹ کی سہولت موجود ہے۔ مصروفیت کی وجہ سے کچھ ماہ ٹریننگ نہیں کرسکا تھا لیکن اب میں اپنی فٹنس پر بھی وقت صرف کررہا ہوں، 1992ء کے ورلڈ کپ اور ماضی کے یادگار میچ کی ویڈیوز دیکھ رہا ہوں جن میں 2012ء میں اماراتی میدانوں میں انگلینڈ کے خلاف ٹیسٹ سیریز میں 0-3 سے جیت، 2014ء میں سری لنکا کے خلاف شارجہ ٹیسٹ کے آخری روز صرف 59 اوورز میں 302 رنز کے ریکارڈ ہدف عبور کرنے والے میچز شامل ہیں۔