انگلینڈ کیخلاف پہلا ٹیسٹ،راشد لطیف کی ممکنہ قومی ٹیم سے سہیل خان باہر

لاہور (اردو پوائنٹ تازہ ترین اخبار۔31جولائی 2020ء ) پاکستان کرکٹ ٹیم کے مایہ ناز سابق کپتان راشد لطیف نے انگلینڈ کے خلاف 5 اگست سے شروع ہونے والے پہلے ٹیسٹ میچ کیلئے ممکنہ 11 کھلاڑیوں کے نام بتا دئیے ہیں۔ تفصیلات کے مطابق اپنے ایک بیان میں 51 سالہ راشد لطیف نے کہا کہ پاکستانی ٹیم 6 بلے بازوں، 3 فاسٹ باﺅلرز اور ایک سپنر یاسر شاہ کیساتھ میدان میں اترے گی جب کہ محمد رضوان کو بطور وکٹ کیپر بلے باز شامل کیا جائے گا، شان مسعود بھی میڈیم فاسٹ باﺅلنگ کر سکتے ہیں، لہٰذا انہیں بھی 6 سے 8 اوورز کروانے کیلئے استعمال کیا جا سکتا ہے، البتہ ہمارے پاس ابھی ایسا کوئی آل راﺅنڈر نہیں جس پر انحصار کیا جا سکے ۔

راشد لطیف نے اپنی ٹیم میں فواد عالم کو بھی شامل کیا ہے جنہوں نے فرسٹ کلاس کرکٹ میں 56.78 کی اوسط کے ساتھ 12 ہزار سے زائد رنز بنا رکھے ہیں اور راشد لطیف کا ماننا ہے کہ ان کی موجودگی سے پاکستانی ٹیم کا مڈل آرڈر بہت مضبوط ہو سکتا ہے تاہم باﺅلرز میں انہوں نے سہیل خان کو نہیں چنا۔

(جاری ہے)

ان کا کہنا تھا شاہین شاہ آفریدی اور محمد عباس نئے گیند کیساتھ باﺅلنگ کریں گے جب کہ نسیم شاہ پرانے گیند سے اپنے فن کا جادو جگائیں گے۔