محمد عباس کی کائونٹی چیمپئن شپ میں دھواں دھار واپسی

لاہور (اردو پوائنٹ تازہ ترین اخبار ۔ 7 ستمبر 2021ء ) پاکستانی ٹیسٹ فاسٹ بائولر محمد عباس نے شاندار باؤلنگ کا مظاہرہ کرتے ہوئے کاؤنٹی چیمپئن شپ میں شاندار واپسی کرتے ہوئے وارکشائر کے خلاف ہیمپشائر کی پہلی اننگز میں 5 وکٹیں حاصل کیں۔ عباس نے 18 اوورز میں 29 رنز دے کر 5 وکٹیں حاصل کیں جن میں 8 میڈن اوور بھی شامل تھے۔ عباس نے وارکشائر کی بیٹنگ یونٹ کو تباہ برباد کرکے رکھ دیا اور اور انگلینڈ کے ٹیسٹ اوپنر ڈوم سیبلی اور واروکشائر کے کپتان ول روڈز کی اہم وکٹیں حاصل کیں ، واروکشائر کی ٹیم 116 رنز بنا کر آؤٹ ہوگئی۔

اس سے قبل ہیمپشائر 89 رنز بنا کر آؤٹ ہو گئی تھی کیونکہ ان کے بلے باز ایجبسٹن ، برمنگھم میں سوئنگ کی کنڈیشز سے ہم آہنگ ہونے میں ناکام رہے ۔

(جاری ہے)

محمد عباس کی پانچ وکٹیں ہیمپشائر کو میچ میں واپس لے آئے کیونکہ وارکشائر پہلی اننگز میں صرف 27 رنز کی برتری حاصل کر سکا۔ محمد عباس سیزن کے شروع میں ہیمپشائر کے سکواڈ کا حصہ تھا لیکن پاکستان کی نمائندگی کی غرض سے صرف چند میچوں کے لیے دستیاب تھا۔

اسے سیزن کے بقیہ حصے کے لئے دوبارہ دستخط کیا گیا تھا اور وہ مقابلہ میں تین میچوں کے لئے دستیاب ہوگا۔ دائیں بازو کے تیز گیند باز نے سیزن کے پہلے حصے میں 7 میچوں میں ہیمپشائر کی نمائندگی کی تھی۔ انہوں نے 15.96 کی اوسط سے 27 وکٹیں حاصل کیں۔ ان کے بہترین اعداد و شمار مڈل سیکس کے خلاف آئے جن کے خلاف انہوں نے 11 رنز دے کر چھ وکٹیں حاصل کیں جس میں میچ میں ہیٹ ٹرک بھی شامل ہے۔عباس ہیمپشائرکائونٹی کی بائولنگ لائن اپ کا اہم حصہ ہے جو 1973ء کے بعد اپنا پہلا کاؤنٹی چیمپئن شپ ٹائٹل جیتنے کے لیے کوشاں ہے۔