قومی ٹیم ون ڈے میچز کیلئے نیدرلینڈز کا دورہ کرے گی :ذرائع

لاہور (اردو پوائنٹ تازہ ترین اخبار ۔ 4 اپریل 2022ء ) ذرائع کا کہنا ہے کہ پاکستان کرکٹ ٹیم 3 ون ڈے میچز کے لیے جولائی میں نیدرلینڈز کا دورہ کرے گی۔ ذرائع کے مطابق 2 سال قبل ون ڈے سیریز کورونا وائرس کے باعث غیرمعینہ مدت کے لیے ملتوی کردی گئی تھی۔ پاکستان اور نیدرلینڈز کے بورڈز اس دورے کے لیے رضا مند ہوگئے ہیں جب کہ تاریخ کا جلد اعلان کیا جائے گا۔

(جاری ہے)

ذرائع کا کہنا ہے کہ پاکستان کرکٹ ٹیم جولائی، اگست میں سری لنکا میں 2 ٹیسٹ اور 3 ون ڈے کھیلے گی جب کہ 27 اگست سے سری لنکا میں ہونے والے ایشیاء کپ میں شریک ہوگی۔ اس کے علاوہ ذرائع کا کہنا ہے کہ پاکستان اور افغانستان بورڈز کے درمیان 3 ون ڈے میچز سے متعلق بات چیت جاری ہے۔