حسن علی کو سپورٹ کریں ،اس کا پیچھا چھوڑ دیں: وسیم اکرم

لاہور (اردو پوائنٹ تازہ ترین اخبار ۔ 9 جون 2022ء ) قومی کرکٹ ٹیم کے سابق کپتان وسیم اکرم قومی ٹیم کے فاسٹ بولر حسن علی کے حق میں بول پڑے۔ سماجی رابطے کی ویب سائٹ ٹوئٹر پر جاری اپنے ویڈیو بیان میں وسیم اکرم کا کہنا ہے کہ فاسٹ بولر حسن علی کو سپورٹ کریں اور اس کا پیچھا چھوڑ دیں۔ انہوں نے کہا کہ حسن علی دوسرا اوور کروا رہا ہوتا ہے اور سوشل میڈیا پر ٹرینڈ چلائے جاتے ہیں کہ اسے کیوں کھلایا؟۔

وسیم اکرم نے کہا کہ حسن علی میچ ونر ہے، بطور سابق کپتان اس کے پیچھے کھڑا ہوں۔

(جاری ہے)

سابق کپتان وسیم اکرم نے اپنے پیغام میں ویسٹ انڈیز کے خلاف میچ جیتنے پر پاکستان کی ٹیم کو مبارکباد بھی دی۔ خیال رہے کہ گزشتہ روز کھیلے گئے پہلے ایک روزہ میچ میں پاکستان نے مہمان ٹیم ویسٹ انڈیز کو 5 وکٹوں سے شکست دی تھی۔ مذکورہ میچ میں حسن علی نے 10 اوورز میں68 رنز دیے تھے اور کوئی وکٹ نہیں لی تھی۔