شاہد آفریدی سے ملنے کے کچھ دیر بعد بزرگ خاتون انتقال کرگئیں

لاہور (اردو پوائنٹ تازہ ترین اخبار ۔ 22 دسمبر 2022ء ) پاکستان کرکٹ ٹیم کے سابق کپتان شاہد آفریدی سے راولپنڈی کرکٹ سٹیڈیم میں ملاقات کرنے والی خاتون انتقال کرگئیں۔ اپنے سوشل میڈیا اکاؤنٹ پر شاہد آفریدی نے پیغام لکھا کہ یہ افسوسناک خبر سن کر میرا دل ٹوٹ گیا کہ میگا سٹار لیگ کے میچ میں ہم سے ملنے کے فوراً بعد بزرگ خاتون کا انتقال ہوگیا، اللہ انہیں جنت میں اعلی مقام عطا کرے۔

شاہد آفریدی نے اپنے اکاؤنٹ پر بزرگ خاتون سے ملاقات کی ویڈیو بھی شیئر کی ہے۔

(جاری ہے)

ویڈیو میں دیکھا جاسکتا ہے کہ خاتون شاہد آفریدی سے بہت ہی محبت کے ساتھ ملتی ہیں جب کہ سابق کپتان بھی ان کے ساتھ بہت ہی احترام اور عزت کے ساتھ پیش آتے ہیں۔ ویڈیو میں دیکھا جاسکتا ہے کہ پاکستان کرکٹ ٹیم کے سابق اسپن بولر سعید اجمل اور شاہین آفریدی کے بڑے بھائی ریاض آفریدی نے بھی بزرگ خاتون سے ملاقات کی۔ شاہد آفریدی نے اسٹیڈیم میں معذور مداح سے بھی ملاقات کی اور شائقین میں چیزیں بھی تقسیم کیں۔