پی ایس ایل کے بخار نے جرمن فٹبال کو بھی اپنی لپیٹ میں لے لیا

لاہور (اردو پوائنٹ تازہ ترین اخبار ۔ 3 مارچ 2023ء ) پی ایس ایل کے بخار نے جرمن فٹبال کو بھی اپنی لپیٹ میں لے لیا، ہیرتھا برلن کے جرمن فٹبالر کیون پرنس بوٹینگ نے شاہین شاہ آفریدی کے انداز میں جشن منایا ۔ ٹورنامنٹ اگلے مرحلے کی طرف بڑھ رہا ہے اور اس کے ساتھ ساتھ پی ایس ایل 8 کے ارد گرد شوروغل بھی بڑھ رہا ہے۔ جہاں ٹیموں کے درمیان پلے آف کی جگہوں کا دعویٰ کرنے کے لیے کشمکش بڑھ رہی ہے، وہیں PSL 8 کا بخار جرمنی کو بھی چڑھا چکا ہے۔

جرمنی میں فٹبالرز بھی پاکستان سپر لیگ سے متاثر دکھائی دیتے ہیں جیسا کہ ٹویٹر پر ہیرتھا برلن کی حالیہ پوسٹ میں دیکھا گیا ہے۔ جرمن فٹبال کلب نے فٹبالر کیون پرنس بوٹینگ کی تصویر پوسٹ کی جس میں شاہین شاہ آفریدی کے جشن کی طرح میدان میں جشن منایا جا رہا ہے۔

(جاری ہے)

ہرتھا برلن نے لاہور قلندرز کے حالیہ میچ کی شاہین آفریدی کی تصویر بھی شیئر کی، جس میں دونوں لمحات کا موازنہ کیا۔

اس پوسٹ پر ردعمل کا اظہار کرتے ہوئے جرمنی کے نئے تعینات ہونے والے پاکستانی کرکٹ کوچ عتیق الزماں نے کہا کہ ’’شاہین آفریدی کا جشن منانے کا انداز شہزادے کے ایکشن سے تھوڑا مختلف ہو سکتا ہے لیکن جرمنی کے فٹبال برادری میں پی ایس ایل کی مقبولیت حیرت انگیز ہے‘‘۔