راشد خان کی پاکستان کو کابل میں کھیلنے کی دعوت

شارجہ (اردو پوائنٹ تازہ ترین اخبار ۔ 25 مارچ 2023ء ) افغانستان کرکٹ ٹیم کے کپتان راشد خان کا کہنا ہے کہ وہ پاکستان ٹیم کو کابل میں کھیلنے کی دعوت دیتے ہیں۔ شارجہ میں کھیلے گئے 3 ٹی ٹونٹی میچز کی سیریز کے پہلے میچ میں جیت کے بعد افغان کپتان راشد خان نے کہا کہ ہمیشہ پاکستان کیخلاف جیت کے قریب پہنچ کر ہار جاتے تھے مگر اس بار فتح مل گئی۔ انہوں نے کہا کہ پہلے ٹی ٹوئنٹی کی پچ پر 120 رنز ہوتے تو جیت ہمارے لیے مشکل ہوجاتی۔

(جاری ہے)

راشد خان کا مزید کہنا تھا کہ ابھی سیریز باقی ہے اسے جیتنے کے خواہشمند ہیں۔ واضح رہے کہ سیریز کے پہلے ٹی ٹونٹی میں افغانستان نے پاکستان کو 6 وکٹوں سے شکست دے دی۔ پاکستان کے 93 رنز کے ہدف کے تعاقب میں افغان ٹیم نے 18 ویں اوورز میں 4 وکٹوں کے نقصان پر ہدف حاصل کرلیا اور یوں پہلی بار کسی انٹرنیشنل میچ میں گرین شرٹس کو شکست دی ہے۔