میلبورن ٹیسٹ، حسن علی کی کرائوڈ کے ساتھ موج مستی کی ویڈیو وائرل

میلبورن (اردو پوائنٹ تازہ ترین اخبار ۔ 28 دسمبر 2023ء ) آسٹریلیا اور پاکستان کے درمیان میلبورن میں کھیلے جانے والے دوسرے ٹیسٹ میچ کے تیسرے روز کھلاڑیوں اور شائقین کے درمیان دوستی کے خوشگوار مظاہرے میں پاکستان کے فاسٹ باؤلر حسن علی نے مزید تفریح کا اضافہ کیا۔ حسن علی نے آسٹریلین کرائوڈ کے ساتھ ایک منفرد اور یادگار انداز میں جشن منانے کا فیصلہ کیا۔

انہوں نے میلبورن کے مسرور سامعین کی خوشامد اور تالیوں کے لیے اپنی رقص کی حرکتیں دکھائیں۔ حسن کے اچانک جشن منانے کی ویڈیو نے سٹینڈز میں جاندار ماحول بنادیا۔ واضح رہے کہ میلبورن ٹیسٹ میں مچل مارش نروس نائنٹیز کا شکار ہوکر پویلین لوٹ گئے، دوسری اننگز میں آسٹریلیا کی پانچ وکٹیں گرگئیں۔

(جاری ہے)

تفصیلات کے مطابق ٹیسٹ میچ کے تیسرے روز پاکستانی فاسٹ بولرز نے عمدہ کم بیک کرتے ہوئے آسٹریلوی ٹاپ آرڈر کو محض 16 رنز پر ہی پویلین راہ دکھا دی، آسٹریلیا نے اپنی دوسری اننگز کا آغاز کیا تو شاہینوں کے تابڑ توڑ حملوں کے نتیجے میں اننگز کی دوسری ہی گیند پر شاہین آفریدی نے عثمان خواجہ کو آؤٹ کردیا، کھانے کے وقفے سے پہلے لبوشین بھی پویلین لوٹ گئے، اس کے بعد میر حمزہ نے 2 گیندوں پر 2 شکار کرتے ہوئے خطرناک بیٹر ڈیوڈ وارنر اور ٹریوس ہیڈ کو کلین بولڈ کردیا۔

اس کے بعد سلپ فیلڈر عبداللہ شفیق نے مچل مارش کا 20 کے انفرادی اسکور پر عامر جمال کی گیند پر کیچ چھوڑ دیا، جس کے بعد انہوں نے کھل کر بیٹنگ کی، میلبورن ٹیسٹ میں یہ پہلا موقع نہیں جب عبداللہ شفیق نے کیچ ڈراپ کیا ہو، اس سے قبل وہ پہلی اننگز میں ڈیوڈ وارنر کا کیچ گراچکے ہیں جس کے بعد انہوں نے پاکستانی بالرز کی خوب درگت بنائی تھی، اسی طرح مچل مارش نے بھی ڈراپ چانس کا بھرپور فائدہ اٹھایا تاہم وہ 96 رنز پر نروس نائنٹیز کا شکار ہوگئے انہیں میر حمزہ نے میدان بدر کیا تو اس وقت آسٹریلیا کا دوسری اننگز میں سکور 169 رنز تھا اور اسے پاکستان پر 223رنز کی لیڈ حاصل ہوچکی تھی۔

قبل ازیں تیسرے روز کھیل کے آغاز پر پاکستانی بلے بازوں محمد رضوان اور عامر جمال نے 6 وکٹوں کے نقصان پر 194 رنز سے پاکستانی اننگز کی دوبارہ شروعات کی، محمد رضوان 51 گیندوں پر 42 رنز بناکر کمنز کی گیند پر وارنر کے ہاتھوں کیچ آؤٹ ہوگئے، اس کے بعد شاہین آفریدی 21، حسن علی اور میر حمزہ اسکور میں صرف 2،2 رنز کا اضافہ کر سکے، عامر جمال 80 گیندوں پر 33 رنز بنا کر ناٹ آؤٹ رہے اور پاکستان کی پوری ٹیم 264 رنز پر پویلین لوٹ گئی جب کہ آسٹریلیا نے اپنی پہلی اننگز میں 318 رنز بنائے تھے۔