اپنی کرکٹ ٹیم بھارت بھیجنے کو تیار ہیں، بھارت کو بھی ٹیم پاکستان بھیجنی چاہیے : احسن اقبال

لاہور (اردو پوائنٹ تازہ ترین اخبار ۔ 27 اپریل 2024ء ) وفاقی وزیر احسن اقبال نے کہا ہے کہ پاکستان اپنی کرکٹ ٹیم بھارت بھیجنے کو تیار ہے۔ جیو نیوز سے گفتگو کرتے ہوئے احسن اقبال نے کہا کہ کھیلوں کو سیاست سے علیحدہ رکھنا چاہیے، ماضی میں پاکستان اور بھارت کے مابین تناؤ تھا لیکن یہ بھی کھیلوں پر اثر انداز نہیں ہوا، بھارت کو بھی چیمپئنز ٹرافی کے لیے پاکستان اپنی ٹیم بھیجنی چاہیے۔

(جاری ہے)

انہوں نے کہا کہ کھیلوں کے لیے تنہا حکومت ہی وسائل مہیا نہیں کرسکتی، ڈیپارٹمنٹس کو ساتھ لے کر چلیں گے۔ احسن اقبال نے کہا کہ بدقسمتی سے پاکستان میں کھیلوں کو نظر انداز کیا گیا، کھیلوں سے ڈیپارٹمنٹس کو ختم کرنا سب سے بڑی غلطی تھی۔ احسن اقبال نے کہا کہ بھرپور کوشش ہے کہ سیف گیمز کا انعقاد 2025ء میں پاکستان میں ہو، پاکستان سپر لیگ کی طرز کی ہاکی لیگ کا پلان بنایا گیا ہے۔