پی ایس ایل، عرفان نیازی شاہین آفریدی کیخلاف اوور میں سب سے زیادہ رنز سکور کرنیوالے بیٹر بن گئے

لاہور قلندرز کیخلاف میچ میں عرفان نیازی نے میچ کے 13 ویں اوور میں شاہین کیخلاف 20 رنز سکور کیے

ذیشان مہتاب پیر 5 مئی 2025 13:46

پی ایس ایل، عرفان نیازی شاہین آفریدی کیخلاف اوور میں سب سے زیادہ رنز سکور کرنیوالے بیٹر بن گئے

لاہور (اردو پوائنٹ تازہ ترین اخبار ۔ 5 مئی 2025ء ) کراچی کنگز کے مڈل آرڈر بیٹر عرفان خان نیازی پی ایس ایل کی تاریخ میں لاہور قلندرز کے کپتان اور فاسٹ باولر شاہین آفریدی کیخلاف ایک اوور میں سب سے زیادہ رنز سکور کرنے والے بیٹر بن گئے ہیں۔

گزشتہ روز لاہور قلندرز کیخلاف میچ میں عرفان نیازی نے میچ کے 13 ویں اوور میں شاہین آفریدی کیخلاف 20 رنز سکور کیے جو پیسر کے خلاف کسی بھی بیٹر کے ایک اوور میں حاصل کردہ رنز کی سب سے بڑی تعداد تھی۔

اس سے قبل کیرون پولارڈ نے کراچی کنگز کیلئے کھیلتے ہوئے ایک اوور میں 19 رنز بنائے تھے، افتخار احمد 4 گیندوں پر 18 رنز سکور کرکے اس فہرست میں تیسرے نمبر پر ہیں۔

واضح رہے کہ پاکستان سپرلیگ (پی ایس ایل) 10 کے بارش سے متاثرہ میچ میں کراچی کنگز نے لاہور قلندرز کو 4 وکٹوں سے شکست دے کر 2 اہم پوائنٹس حاصل کرلیے۔

(جاری ہے)

لاہور کے قذافی اسٹیڈیم میں پی ایس ایل 10 کے 24 ویں میچ میں کراچی کنگز نےلاہور قلندرز کے خلاف ٹاس جیت کر فیلڈنگ کا فیصلہ کیا۔

لاہور قلندرز نے 7.5 اوورز میں ایک وکٹ پر 90 رنز بنائے تھے کہ ہلکی بارش شروع ہوگئی جس کے سبب میچ کو روکنا پڑا اور میچ بارش کے سبب فی اننگز 15 اوورز تک محدود کر دیا گیا۔

لاہور قلندرز نے مقررہ 15 اوورز میں 8 وکٹ پر 160رنز بنائے تھے، ڈک ورتھ لوئیس میتھڈ کے تحت ہدف میں تبدیلی کی گئی اور کراچی کو 168 رنز کا ہدف ملا۔

لاہور کی جانب سے محمد نعیم نے 65 اور فخر زمان نے 51 رنز بنائے۔

کراچی کنگز کی جانب سے عباس آفریدی نے 4 کھلاڑیوں کو آؤٹ کیا۔

جواب میں کراچی کنگز نے لاہور قلندرز کا 168 رنز کا ہدف 15 ویں اوور میں 6 وکٹوں کے نقصان پر با آسانی حاصل کرلیا۔ ڈیوڈ وارنر اور ٹم سائفرٹ نے 24،24 رنز سکور کیے، سعد بیگ نے 25، خوشدل شاہ نے 9 اور محمد نبی نے 15 رنز بنائے۔ اختتامی اوورز میں عرفان خان نیازی نے 21 گیندوں پر 48 رنز کی ناقابل شکست اننگز کھیل کر کراچی کو میچ جتوا دیا۔ان کی برق رفتار اننگز میں 5 چھکے اور 2 چوکے شامل تھے۔

وقت اشاعت : 05/05/2025 - 13:46:00