وزیراعلیٰ سندھ کاعالمی باکسنگ چیمپئن عالیہ سومرو کو 10 لاکھ روپے انعام

کراچی (اُردو پوائنٹ اخبارتازہ ترین - اے پی پی۔ 08 مئی2025ء) وزیر اعلیٰ سندھ سید مراد علی شاہ نے لیاری کی 19 سالہ عالمی باکسنگ چیمپئن عالیہ سومرو سے ملاقات کر کےانہیں 10 لاکھ روپے نقد انعام اور ہر ممکن تعاون کی پیشکش کی۔جاری اعلامیہ کے مطابق یہ ملاقات وزیراعلیٰ ہاؤس میں ہوئی جس میں صوبائی وزیر علی حسن زرداری، میئر کراچی مرتضیٰ وہاب، پرنسپل سیکرٹری آغا واصف اور ارکان صوبائی اسمبلی شازیہ کریم اور محمد یوسف بھی موجود تھے۔

(جاری ہے)

عالیہ سومرو نے حال ہی میں تاریخ رقم کرتے ہوئے عالمی باکسنگ ٹائٹل جیتنے والی پہلی پاکستانی خاتون ہونے کا اعزاز حاصل کیا۔اس وقت وہ تھائی لینڈ میں تربیت حاصل کر رہی ہیں اور دو ماہ بعد دبئی میں ایک بھارتی باکسر کے خلاف مقابلہ کریں گی۔وزیر اعلیٰ مراد علی شاہ نے عالیہ کی اس کامیابی کو سراہتے ہوئے انہیں ایشین گیمز کی تیاری شروع کرنے کی ہدایت دی اور مکمل تعاون کا یقین دلایا۔ انہوں نے کہا کہ محنت کرو،سندھ حکومت تمہارے ساتھ ہے۔