پاک بنگلادیش ٹی ٹونٹی سیریز: باسط علی نے شاداب خان کی سلیکشن پر اعتراض اُٹھا دیا

پی ایس ایل پرفارمنس کی بنیاد پر سینئرز منتخب ہوئے تو نوجوان کہاں جائیں گے : سابق کرکٹر

ذیشان مہتاب جمعرات 22 مئی 2025 12:42

پاک بنگلادیش ٹی ٹونٹی سیریز: باسط علی نے شاداب خان کی سلیکشن پر اعتراض اُٹھا دیا

لاہور (اردو پوائنٹ تازہ ترین اخبار ۔ 22 مئی 2025ء ) قومی ٹیم کے سابق ٹیسٹ کرکٹر باسط علی نے بنگلادیش کے خلاف ٹی 20 سیریز کےلیے قومی اسکواڈ میں شاداب خان کی سلیکشن پر اعتراض اُٹھا دیا۔

باسط علی نے ایک نجی ٹی وی شو میں بطور مہمان شرکت کی جہاں انہوں نے بنگلادیش کے خلاف ٹی 20 سیریز کےلیے منتخب کیے گئے قومی اسکواڈ کے بارے میں اپنی رائے کا اظہار کیا۔

انہوں نے کہا کہ بطور سلیکٹر میں شاداب خان کو صرف پی ایس ایل کی کارکردگی کی بنیاد پر کبھی بھی قومی اسکواڈ میں شامل نہیں کرتا۔

سابق ٹیسٹ کرکٹر نے کہا کہ ہمارے پاس ابرار، سفیان اور خوشدل شاہ جیسے کھلاڑی ہیں جو قومی اسکواڈ میں منتخب ہونے کے حقدار ہیں۔

اُنہوں نے اپنی بات کی وضاحت دیتے ہوئے کہا کہ اگر پی ایس ایل کی کارکردگی کی بنیاد پر بھی سینئر کھلاڑی ہی قومی ٹیم کےلیے منتخب ہوتے رہے تو نوجوان کھلاڑی کہاں جائیں گے؟۔

(جاری ہے)

واضح رہے کہ بنگلادیش کے خلاف 3 ٹی 20 میچز کی سیریز کے لیے پاکستان کے 16 رکنی سکواڈ کا اعلان کردیا گیا۔

سکواڈ میں سلمان علی آغا، شاداب خان، ابرار احمد، فہیم اشرف، فخر زمان، حارث رؤف، حسن علی، حسن نواز، حسین طلعت، محمد عرفان خان، خوشدل شاہ، محمد حارث، محمد وسیم جونیئر، نسیم شاہ، صاحبزادہ فرحان (وکٹ کیپر) اور صائم ایوب شامل ہیں۔

وقت اشاعت : 22/05/2025 - 12:42:30