ایس این جی پی ایل کے زیر اہتمام پہلے آل پاکستان رینکنگ بیڈمنٹن ٹورنامنٹ کی افتتاحی تقریب کا انعقاد

راولپنڈی (اُردو پوائنٹ اخبارتازہ ترین - اے پی پی۔ 25 جون2025ء) ایس این جی پی ایل کے زیر اہتمام پہلے آل پاکستان رینکنگ بیڈمنٹن ٹورنامنٹ کی افتتاحی تقریب واہ کینٹ میں منعقد ہوئی جس کے مہمان خصوصی ایس این جی پی ایل کے جنرل منیجر محمد ارشد تھے۔ اس موقع پر ڈپٹی ڈائریکٹر پی او ایف اسپورٹس بورڈ کرنل غلام ربانی، سیکرٹری اسپورٹس پی او ایف قیصر بھٹی، سیکرٹری جنرل پاکستان بیڈمنٹن فیڈریشن راجہ اظہر محمود اور ایس این جی پی ایل کے اعلیٰ افسران بھی موجود تھے۔

(جاری ہے)

مہمان خصوصی نے ٹورنامنٹ کا باقاعدہ افتتاح شٹل کاک مار کر کیا اور تمام کھلاڑیوں، آفیشلز اور اسپورٹس اسٹاف کو خوش آمدید کہا۔ انہوں نے اس عزم کا اظہار کیا کہ ایس این جی پی ایل مستقبل میں بھی قومی سطح کے بیڈمنٹن مقابلوں کا انعقاد کرتا رہے گا۔ پاکستان بیڈمنٹن فیڈریشن کے صدر واجد علی چوہدری اور سیکرٹری جنرل راجہ اظہر محمود کی جانب سے ایس این جی پی ایل اور پی او ایف کا شکریہ ادا کیا گیا اور اس تعاون کو سراہا گیا۔ ان کا کہنا تھا کہ اس ٹورنامنٹ میں ملک بھر سے 200 سے زائد کھلاڑی حصہ لے رہے ہیں۔ ٹورنامنٹ کے افتتاحی روز تمام کیٹیگریز کے کوالیفائنگ راؤنڈز کھیلے گئے جب کہ مین راؤنڈ کا آغاز (کل) بروز جمعرات سے ہو گا۔